ಬಂಟ್ವಾಳ, ಮಾ. 11: ಬಿ.ಸಿ.ರೋಡ್ ಸಮೀಪದ ತಲಪಾಡಿ ಪ್ರದೇಶದಲ್ಲಿರುವ ಆಟೋ ರಿಕ್ಷಾ ಗ್ಯಾಸ್ ಬಂಕ್ನಲ್ಲಿ ದಿಢೀರನೆ 1 ಕೆ.ಜಿ. ಗ್ಯಾಸಿನ ದರವನ್ನು 10 ರೂ. ಹೆಚ್ಚಿಸಿರುವುದನ್ನು ವಿರೋಧಿಸಿ ಆಟೋ ಚಾಲಕರು ಪ್ರತಿಭಟನೆ ನಡೆಸಿದ ಘಟನೆ ಮಂಗಳವಾರ ನಡೆದಿದೆ. ಬಳಿಕ ಪೊಲೀಸ್ ಮಧ್ಯಪ್ರವೇಶದಿಂದ ಹೆಚ್ಚಿಸಿದ ದರವನ್ನು ಹಿಂಪಡೆಯಲಾಗಿದೆ.
ಆಟೋಗಳಿಗೆ ಬಳಸುವ ಗ್ಯಾಸ್ನ ಅಧಿಕೃತ ದರ ಪ್ರತಿ ಕೆ.ಜಿ.ಗೆ 67.45 ರೂ. ಆಗಿದ್ದರೂ, ತಲಪಾಡಿ ಬಂಕ್ನಲ್ಲಿ ಮಂಗಳವಾರ ದರವನ್ನು ಏಕಾಏಕಿ 10 ರೂ. ಹೆಚ್ಚಿಸಲಾಗಿದೆ. ಇದರಿಂದ ಆಕ್ರೋಶಗೊಂಡ ಆಟೋ ಚಾಲಕರು ಗ್ಯಾಸ್ ಪಂಪ್ ಮುಂಭಾಗದಲ್ಲಿ ಪ್ರತಿಭಟನೆ ಆರಂಭಿಸಿದರು. ಪರಿಸ್ಥಿತಿ ತಿಳಿದು ಸ್ಥಳಕ್ಕೆ ಆಗಮಿಸಿದ ಬಂಟ್ವಾಳ ನಗರ ಪೊಲೀಸರು ಪಂಪ್ ನಿರ್ವಹಣಾ ಪ್ರತಿನಿಧಿಗಳೊಂದಿಗೆ ಮಾತುಕತೆ ನಡೆಸಿದರು. ಬಳಿಕ ಹೆಚ್ಚಿಸಿದ್ದ ದರವನ್ನು ಹಿಂಪಡೆಯಲಾಗಿದ್ದು, ಪ್ರತಿಭಟನೆ ಅಂತ್ಯಗೊಂಡಿತು.
ಇದಾದ ನಂತರ ಆಟೋ ಸಂಘಟನೆಯ ಸದಸ್ಯರು ಮತ್ತು ಚಾಲಕರು ಸ್ಥಳದಿಂದ ಶಾಂತಿಯುತವಾಗಿ ತೆರಳಿದರು.
ಗ್ಯಾಸ್ ಕೊರತೆ ಆತಂಕ; ಹೋಟೆಲ್ಗಳಿಗೆ ಸಂಕಷ್ಟ ಸಾಧ್ಯ
ಇದೊಂದರ ನಡುವೆಯೇ ಬಂಟ್ವಾಳ ತಾಲೂಕು ವ್ಯಾಪ್ತಿಯಲ್ಲಿ ಅಡುಗೆ ಅನಿಲದ ಸಂಗ್ರಹ ಕ್ರಮೇಣ ಕಡಿಮೆಯಾಗುತ್ತಿರುವ ಬಗ್ಗೆ ಮಾಹಿತಿ ಲಭ್ಯವಾಗಿದೆ. ಏಜೆನ್ಸಿಗಳಿಗೆ ಗ್ರಾಹಕರ ಬೇಡಿಕೆಗೆ ತಕ್ಕಂತೆ ಸಿಲಿಂಡರ್ ಪೂರೈಕೆ ಮಾಡಲು ತೊಂದರೆ ಎದುರಾಗುತ್ತಿದೆ ಎನ್ನಲಾಗಿದೆ.
ಪ್ರಸ್ತುತ ತಾಲೂಕಿನ ಬಹುತೇಕ ಹೋಟೆಲ್ಗಳಲ್ಲಿ ಒಂದೆರಡು ದಿನಗಳಿಗೆ ಸಾಕಾಗುವಷ್ಟು ಸಿಲಿಂಡರ್ ಸಂಗ್ರಹವಿದ್ದು, ನಿಧಾನಗತಿಯ ಪೂರೈಕೆ ನಡೆಯುತ್ತಿರುವುದರಿಂದ ತಕ್ಷಣದ ಕೊರತೆ ಕಂಡುಬಂದಿಲ್ಲ. ಆದರೆ ಮುಂದಿನ ದಿನಗಳಲ್ಲಿ ಪೂರೈಕೆ ಸರಿಯಾಗದಿದ್ದರೆ ಹೋಟೆಲ್ಗಳನ್ನು ಮುಚ್ಚುವ ಪರಿಸ್ಥಿತಿ ಎದುರಾಗುವ ಭೀತಿ ವ್ಯಕ್ತವಾಗಿದೆ.
