ಪುತ್ತೂರು, ಮಾ. 4: ನಗರದಲ್ಲಿ ಮಂಗಳವಾರ ಮಧ್ಯಾಹ್ನದ ಬಳಿಕ ಕಡಿಮೆ ಎತ್ತರದಲ್ಲಿ ವಿಮಾನವೊಂದು ಪದೇಪದೇ ಸುತ್ತಾಟ ನಡೆಸಿದ ಘಟನೆ ಕೆಲಕಾಲ ಸಾರ್ವಜನಿಕರಲ್ಲಿ ಆತಂಕಕ್ಕೆ ಕಾರಣವಾಯಿತು. ಬಳಿಕ ಇದು ಭೂ-ಭೌತಿಕ ಸಮೀಕ್ಷೆಗೆ ಸಂಬಂಧಿಸಿದ ಹಾರಾಟವಾಗಿರುವುದು ತಿಳಿದುಬಂದ ಹಿನ್ನೆಲೆಯಲ್ಲಿ ಜನರು ನಿಟ್ಟುಸಿರು ಬಿಟ್ಟರು.
ನಗರದ ವಿವಿಧ ಭಾಗಗಳ ಮೇಲ್ಭಾಗದಲ್ಲಿ ಭೂಮಿ ಮಟ್ಟಕ್ಕೆ ಅತೀ ಸಮೀಪವಾಗಿ ವಿಮಾನ ಹಾರಾಟ ನಡೆಸಿದ್ದು, ಸುಮಾರು 10ರಿಂದ 15 ಬಾರಿ ಸುತ್ತು ಹಾಕಿದ ದೃಶ್ಯ ಗಮನಕ್ಕೆ ಬಂದಿದೆ. ಡ್ರೋನ್ ಮಾದರಿಯಲ್ಲಿ ಏಕಾಏಕಿ ಕಾಣಿಸಿಕೊಂಡ ಈ ಹಾರಾಟದ ಉದ್ದೇಶ ಏನು ಎಂಬುದು ಆರಂಭದಲ್ಲಿ ಸ್ಪಷ್ಟವಾಗಿರಲಿಲ್ಲ.
ನಂತರ ಲಭಿಸಿದ ಮಾಹಿತಿಯಂತೆ, ಪಶ್ಚಿಮ ಘಟ್ಟ ಪ್ರದೇಶಗಳಲ್ಲಿ ಭೂಗರ್ಭ ಅಧ್ಯಯನ ಕೈಗೊಳ್ಳುತ್ತಿರುವ ‘ಕ್ಯಾಲಿಬರ್ ಏರ್ಬೋನ್ ಜಿಯೋಫಿಸಿಕ್ಸ್’ ಸಂಸ್ಥೆಗೆ ಸೇರಿದ ಸೆಸ್ನಾ ವಿಮಾನ ಇದಾಗಿದ್ದು, ಭೂಮಿಯ ಅಡಿಭಾಗದ ವೈಜ್ಞಾನಿಕ ಮಾಹಿತಿ ಸಂಗ್ರಹಿಸುವ ಉದ್ದೇಶದಿಂದ ಹಾರಾಟ ನಡೆಸುತ್ತಿದೆ.
ಈ ವಿಮಾನ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಜನವರಿ 10ರಿಂದ ಕಾರ್ಯಾಚರಣೆ ಆರಂಭಿಸಿದ್ದು, ಕರಾವಳಿ ಹಾಗೂ ಉತ್ತರ-ದಕ್ಷಿಣ ಒಳನಾಡು ಭಾಗಗಳಲ್ಲಿ ಅಪರೂಪದ ಖನಿಜ ಸಂಪತ್ತು, ಭೂಗರ್ಭ ಜಲ ಸಂಪನ್ಮೂಲ ಮತ್ತು ಚುಂಬಕ ಕ್ಷೇತ್ರದ ಬದಲಾವಣೆಗಳ ಕುರಿತು ಎರಡು ತಿಂಗಳ ಅವಧಿಯಲ್ಲಿ ಸಮೀಕ್ಷೆ ನಡೆಸುವ ಯೋಜನೆ ಹೊಂದಿದೆ ಎಂದು ಪೊಲೀಸ್ ಇಲಾಖೆ ಸ್ಪಷ್ಟಪಡಿಸಿದೆ.
