ಮಲ್ಪೆ, ಮಾ.2: ಪಡುಕರೆ ಬೀಚ್ಗೆ ಭೇಟಿ ನೀಡಿ ಗೆಸ್ಟ್ಹೌಸ್ನಲ್ಲಿ ತಂಗಿದ್ದ ಬೆಂಗಳೂರಿನ ನಿವಾಸಿ ಲೆನ್ಸಿ ಮೇರಿ (36) ಅವರು ಮಲಗಿದ್ದಲ್ಲೇ ಸಾವನ್ನಪ್ಪಿದ ಘಟನೆ ಫೆಬ್ರವರಿ 28ರಂದು ನಡೆದಿದೆ. ಅವರು ಎಲ್. ಜಾಕ್ಸನ್ ಅವರ ಪತ್ನಿಯಾಗಿದ್ದು, ಫಿನ್ಡೆಮ್ ಕಂಪನಿಯಲ್ಲಿ ಉದ್ಯೋಗದಲ್ಲಿದ್ದರು.
ಫೆಬ್ರವರಿ 26ರಂದು ಬೆಳಿಗ್ಗೆ 4 ಗಂಟೆ ಸುಮಾರಿಗೆ ಇನ್ನು 9 ಮಂದಿಯೊಂದಿಗೆ ಬೆಂಗಳೂರಿನಿಂದ ಪ್ರಯಾಣ ಬೆಳೆಸಿ ಮಧ್ಯಾಹ್ನ 1 ಗಂಟೆ ವೇಳೆಗೆ ಉಡುಪಿಗೆ ಆಗಮಿಸಿ, ಮಲ್ಪೆ ಪಡುಕರೆಯ ಬೀಚ್ ಹೌಸ್ನಲ್ಲಿ ವಾಸ್ತವ್ಯ ಹೂಡಿದ್ದರು. ಫೆಬ್ರವರಿ 27ರಂದು ಮಲ್ಪೆ ಬೀಚ್ನಲ್ಲಿ ಸಮಯ ಕಳೆಯುವ ಮೂಲಕ ಮಧ್ಯಾಹ್ನ ಕೊಠಡಿಗೆ ವಾಪಸ್ಸಾಗಿ ವಿಶ್ರಾಂತಿ ಪಡೆದಿದ್ದರು. ರಾತ್ರಿ ಆನ್ಲೈನ್ ಮೂಲಕ ಆಹಾರ ತರಿಸಿಕೊಂಡು ಸೇವಿಸಿ ಮಲಗಿದ್ದರು ಎನ್ನಲಾಗಿದೆ.
ಮುಂದಿನ ದಿನ ಬೆಳಿಗ್ಗೆ ಅವರನ್ನು ಎಬ್ಬಿಸಲು ಯತ್ನಿಸಿದಾಗ ಪ್ರತಿಕ್ರಿಯೆ ನೀಡದ ಹಿನ್ನೆಲೆ ತಕ್ಷಣ ಮಣಿಪಾಲದ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಪರಿಶೀಲನೆ ನಡೆಸಿದ ವೈದ್ಯರು ಲೆನ್ಸಿ ಮೇರಿ ಮೃತಪಟ್ಟಿರುವುದಾಗಿ ತಿಳಿಸಿದ್ದಾರೆ. ಪ್ರಾಥಮಿಕವಾಗಿ ಹೃದಯಾಘಾತವೇ ಸಾವಿಗೆ ಕಾರಣವಾಗಿರಬಹುದು ಎಂದು ಶಂಕಿಸಲಾಗಿದೆ.
