ಉಡುಪಿ, ಫೆ. 28: ಸಾಮಾಜಿಕ ಜಾಲತಾಣದಲ್ಲಿ ಕಂಡ ಲಿಂಕ್ ಮೇಲೆ ಕ್ಲಿಕ್ ಮಾಡಿ ಅಪರಿಚಿತ ಎಪಿಕೆ ಫೈಲ್ ಡೌನ್ಲೋಡ್ ಮಾಡಿಕೊಂಡ ಪರಿಣಾಮ ವ್ಯಕ್ತಿಯೊಬ್ಬರು ₹1.60 ಲಕ್ಷ ಹಣ ಕಳೆದುಕೊಂಡಿರುವ ಘಟನೆ ನಗರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ವರದಿಯಾಗಿದೆ.
ಭಾಸ್ಕರ್ (63) ಅವರು ಫೆಬ್ರವರಿ 24ರಂದು ಮಧ್ಯಾಹ್ನ ಸುಮಾರು 3.30ರ ವೇಳೆಗೆ ಮನೆಯಲ್ಲಿ ಫೇಸ್ಬುಕ್ ವೀಕ್ಷಿಸುತ್ತಿದ್ದಾಗ “BB TV.APK Latest Web Series and Movies” ಎಂಬ ಶೀರ್ಷಿಕೆಯ ಲಿಂಕ್ ಮೇಲೆ ಒತ್ತಿ ಆ ಅಪ್ಲಿಕೇಶನ್ ಅನ್ನು ಮೊಬೈಲ್ಗೆ ಇನ್ಸ್ಟಾಲ್ ಮಾಡಿಕೊಂಡಿದ್ದರು ಎಂದು ತಿಳಿದುಬಂದಿದೆ.
ಇದಾದ ಬಳಿಕ ಫೆಬ್ರವರಿ 26ರಂದು ಬೆಳಗ್ಗೆ 11.50ರ ಸುಮಾರಿಗೆ ಕೆನರಾ ಬ್ಯಾಂಕ್ ಮೊಬೈಲ್ ಅಪ್ಲಿಕೇಶನ್ ಮೂಲಕ ಖಾತೆ ವಿವರ ಪರಿಶೀಲಿಸಿದಾಗ, ಫೆಬ್ರವರಿ 25ರ ಬೆಳಗ್ಗೆ 9.30ರಿಂದ ಫೆಬ್ರವರಿ 26ರ ಬೆಳಗ್ಗೆ 9.48ರ ನಡುವೆ ಕ್ರಮವಾಗಿ ₹65,000, ₹15,000, ₹15,000 ಮತ್ತು ₹65,000 ಸೇರಿ ಒಟ್ಟು ₹1,60,000 ಹಣ ಖಾತೆಯಿಂದ ಡೆಬಿಟ್ ಆಗಿರುವುದು ಗಮನಕ್ಕೆ ಬಂದಿದೆ.
ಅಪ್ಲಿಕೇಶನ್ ಡೌನ್ಲೋಡ್ ಮಾಡಿದ ನಂತರ ಅಪರಿಚಿತರು ಮೊಬೈಲ್ನ ರಿಮೋಟ್ ಆಕ್ಸೆಸ್ ಪಡೆದು ಆನ್ಲೈನ್ ಮೂಲಕ ಹಣ ವರ್ಗಾವಣೆ ನಡೆಸಿ ವಂಚನೆ ಎಸಗಿರುವ ಶಂಕೆ ವ್ಯಕ್ತವಾಗಿದೆ. ಈ ಸಂಬಂಧ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.
