ಫೀನಿಕ್ಸ್, ಅಕ್ಟೋಬರ್ 24, 2026: ಚತುರ್ಥ ವಿಶ್ವಗೀತಾ ಪರ್ಯಾಯವನ್ನು ಯಶಸ್ವಿಯಾಗಿ ಪೂರೈಸಿ ಅಮೆರಿಕದ ಫೀನಿಕ್ಸ್‌ಗೆ ಆಗಮಿಸಿದ ಉಡುಪಿ ಶ್ರೀಪುತ್ತಿಗೆ ಮಠದ ಪರಮಪೂಜ್ಯ ಯತಿಕುಲ ಚಕ್ರವರ್ತಿ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದರಿಗೆ ಶ್ರೀ ವೆಂಕಟಕೃಷ್ಣ ಕ್ಷೇತ್ರದಲ್ಲಿ ವೈಭವದ ಗುರುವಂದನಾ ಮಹೋತ್ಸವ ನಡೆಯಿತು.
ಶ್ರೀಧರ್ ಚೆನ್ನಗಿರಿ ಅವರು ಶ್ರೀಪಾದರನ್ನು ಸ್ವಾಗತಿಸಿ, ನೂತನ ದೇವಾಲಯ ಸಂಕೀರ್ಣಕ್ಕಾಗಿ ಭೂಮಿ ಸ್ವಾಧೀನಪಡಿಸಿಕೊಂಡಿರುವುದು ಸಂಸ್ಥೆಯ ಐತಿಹಾಸಿಕ ಮೈಲಿಗಲ್ಲು ಎಂದರು. ಭಕ್ತರು ಶ್ರೀಪಾದರಿಗೆ ಮಾನಪತ್ರ ಸಮರ್ಪಿಸಿ, ಶಾಲು ಹೊದಿಸಿ, ಪುಷ್ಪಾರ್ಪಣೆ ಹಾಗೂ ಪುಷ್ಪವೃಷ್ಟಿಯೊಂದಿಗೆ ಗೌರವ ಸಲ್ಲಿಸಿದರು.
ಖ್ಯಾತ ಸಮಾಜಚಿಂತಕ ಹಾಗೂ ವಾಗ್ಮಿ ಶ್ರೀ ರವೀಂದ್ರ ಜೋಶಿ ಅವರು, ಶ್ರೀಪಾದರು ವಿಶ್ವದಾದ್ಯಂತ ಭಾರತೀಯ ಸಂಸ್ಕೃತಿ ಮತ್ತು ಆಧ್ಯಾತ್ಮಿಕತೆಯ ಸಂದೇಶವನ್ನು ಹರಡುತ್ತಿರುವ ಮಹಾನ್ ಧರ್ಮಪ್ರಚಾರಕರು ಎಂದು ಬಣ್ಣಿಸಿದರು.
ಸ್ಥಳೀಯ ಭಕ್ತರಾದ ರಾಧಾ–ರವಿ ಅವರು ಶ್ರೀಪಾದರ ಅವಿಶ್ರಾಂತ ಸೇವೆ ಮತ್ತು ದೂರದೃಷ್ಟಿಯನ್ನು ಸ್ಮರಿಸಿದರು. ಮುಕುಂದ್ ಅವರು, ವಿದೇಶದಲ್ಲಿರುವ ಭಾರತೀಯರಿಗೆ ಪೂಜೆ, ಹೋಮ, ಹಬ್ಬ ಮತ್ತು ಧಾರ್ಮಿಕ ಆಚರಣೆಗಳನ್ನು ನಡೆಸಲು ಶ್ರೀಪಾದರು ಕಲ್ಪಿಸಿರುವ ವೇದಿಕೆ ಅಮೂಲ್ಯವಾದುದು ಎಂದರು.
ಡಾ. ದಿನಕರ ಮಲ್ಲಾಡಿ ಅವರು, ಸುಮಾರು ಇಪ್ಪತ್ತು ವರ್ಷಗಳಿಂದ ಶ್ರೀಪಾದರೊಂದಿಗೆ ಹೊಂದಿರುವ ಒಡನಾಟ ಹಾಗೂ ಅವರ ಪ್ರೀತಿ ಮತ್ತು ಭಕ್ತವಾತ್ಸಲ್ಯವನ್ನು ಸ್ಮರಿಸಿದರು. ಮೀರಾ ತಾಡಪತ್ರಿ ಅವರು, ಶ್ರೀಪಾದರು ಧರ್ಮವನ್ನು ಕೇವಲ ಬೋಧಿಸದೆ ತಮ್ಮ ಜೀವನದಲ್ಲೇ ಆಚರಿಸುತ್ತಿರುವ ಆದರ್ಶ ಗುರುಗಳು ಎಂದರು. ಭಕ್ತರಾದ ಶ್ರೀ ಪವಮಾನ ಅವರು, ಶ್ರೀ ವೆಂಕಟಕೃಷ್ಣ ಕ್ಷೇತ್ರವು ಫೀನಿಕ್ಸ್‌ನ ಭಾರತೀಯ ಸಮುದಾಯಕ್ಕೆ ಎರಡನೇ ಮನೆಯಾಗಿದೆ ಎಂದು ಹೇಳಿದರು.
ಆಶೀರ್ವಚನ ನೀಡಿದ ಶ್ರೀಪಾದರು, “ಎಲ್ಲವನ್ನೂ ನಾನು ಮಾಡುತ್ತಿದ್ದೇನೆ ಎಂಬ ಅಹಂಕಾರವನ್ನು ತೊರೆದು, ಭಗವಂತನೇ ನಮ್ಮ ಮೂಲಕ ಕಾರ್ಯ ಮಾಡಿಸುತ್ತಿದ್ದಾನೆ ಎಂಬ ಭಾವದಿಂದ ಸೇವೆ ಸಲ್ಲಿಸಿದಾಗ ಜೀವನದಲ್ಲಿ ಶಾಂತಿ ಮತ್ತು ಸಂತೋಷ ದೊರೆಯುತ್ತದೆ” ಎಂದರು.
ಕೋಟಿಗೀತಾ ಲೇಖನ ಯಜ್ಞ ಸೇರಿದಂತೆ ಅನೇಕ ಯೋಜನೆಗಳ ಮೂಲಕ ಭಗವದ್ಗೀತೆಯ ಸಂದೇಶವನ್ನು ವಿಶ್ವದಾದ್ಯಂತ ಪಸರಿಸುವುದೇ ವಿಶ್ವಗೀತಾ ಪರ್ಯಾಯದ ಮುಖ್ಯ ಸಂಕಲ್ಪವಾಗಿತ್ತು ಎಂದು ತಿಳಿಸಿದರು. ಅಮೆರಿಕದ ಭೌತಿಕ ಪ್ರಗತಿ ಮತ್ತು ಭಾರತದ ಆಧ್ಯಾತ್ಮಿಕ ಶಕ್ತಿ ಒಂದಾದಾಗ ವಿಶ್ವಕ್ಕೆ ಉತ್ತಮ ಮಾರ್ಗದರ್ಶನ ದೊರೆಯುತ್ತದೆ. AI ಎಂದರೆ America and India ಎಂಬ ಸಂದೇಶದ ಮೂಲಕ ಉಭಯ ದೇಶಗಳ ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ಸಹಕಾರದ ಮಹತ್ವವನ್ನು ವಿವರಿಸಿದರು.
ವಿದೇಶದಲ್ಲಿರುವ ಭಾರತೀಯರು ತಮ್ಮ ಸಂಸ್ಕೃತಿ, ಆಧ್ಯಾತ್ಮಿಕತೆ ಮತ್ತು ಸನಾತನ ಧರ್ಮವನ್ನೇ ನಿಜವಾದ ಗುರುತಾಗಿ ಉಳಿಸಿಕೊಂಡು ಮುಂದಿನ ಪೀಳಿಗೆಗೆ ನೀಡಬೇಕು. ನೂತನ ಭವ್ಯ ದೇವಾಲಯದ ನಿರ್ಮಾಣಕ್ಕೆ ಭಕ್ತರೆಲ್ಲರೂ ಸಂಪೂರ್ಣ ಸಹಕಾರ ನೀಡಬೇಕು ಎಂದು ಶ್ರೀಪಾದರು ಕರೆ ನೀಡಿದರು.
ಪುತ್ತಿಗೆ ಮಠದ ಅಂತಾರಾಷ್ಟ್ರೀಯ ಕಾರ್ಯದರ್ಶಿ ಶ್ರೀ ಪ್ರಸನ್ನಾಚಾರ್ಯರು ಹಾಗೂ ದಿವಾನ್ ಶ್ರೀ ನಾಗರಾಜಾಚಾರ್ಯರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು. ಪ್ರಧಾನ ಅರ್ಚಕರಾದ ಶ್ರೀ ಕಿರಣ್ ರಾವ್ ಅವರು ಧನ್ಯವಾದ ಸಮರ್ಪಿಸಿದರು.
ಸಭೆಯ ಬಳಿಕ ಶ್ರೀ ವೆಂಕಟಕೃಷ್ಣ ಹಾಗೂ ಶ್ರೀನಿವಾಸ ದೇವರಿಗೆ ವೈಭವದ ಪಲ್ಲಕ್ಕಿ ಉತ್ಸವ ನಡೆಯಿತು. ಉಡುಪಿಯ ಸಾಂಪ್ರದಾಯಿಕ ಚಂಡೆ ವಾದನದೊಂದಿಗೆ ದೇವರ ಮೆರವಣಿಗೆ ಜರುಗಿತು. ಉದಯಕುಮಾರ್ ಅವರು ದೇವರನ್ನು ಹೊತ್ತು ಭಕ್ತಿಪೂರ್ವಕ ನೃತ್ಯಸೇವೆ ಸಲ್ಲಿಸಿದರು.
ಭಾರತದಿಂದ ಆಗಮಿಸಿದ ಪ್ರಕಾಶ್ ದೇವಾಡಿಗ ಮತ್ತು ಹೊನ್ನಪ್ಪ ದೇವಾಡಿಗ ಅವರ ಸ್ಯಾಕ್ಸೊಫೋನ್ ವಾದನಸೇವೆ ಉತ್ಸವದ ವಿಶೇಷ ಆಕರ್ಷಣೆಯಾಗಿತ್ತು. ಮಠದ ವಿದ್ವಾಂಸರು, ಅರ್ಚಕರು, ಟ್ರಸ್ಟಿಗಳು, ಸೇವಾಕರ್ತರು ಹಾಗೂ ಅಪಾರ ಸಂಖ್ಯೆಯ ಭಕ್ತರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
