ಬೆಂಗಳೂರು, 8 ಏಪ್ರಿಲ್ 2026: ಭಾರತದ ಅತಿದೊಡ್ಡ ವಾಣಿಜ್ಯ ವಾಹನ ತಯಾರಿಕಾ ಸಂಸ್ಥೆಯಾದ ಟಾಟಾ ಮೋಟಾರ್ಸ್, ಎಲೆಕ್ಟ್ರಿಕ್ ವಾಹನ ಕ್ಷೇತ್ರದಲ್ಲಿನ ತನ್ನ ಪಾರಮ್ಯವನ್ನು ಮುಂದುವರಿಸುತ್ತಾ, ನೂತನ ‘ಟಾಟಾ ಇಂಟ್ರಾ ಇವಿ’ ಪಿಕಪ್ ಅನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ಸರಕು ಸಾಗಣೆದಾರರ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ವಿನ್ಯಾಸಗೊಳಿಸಲಾದ ಈ ವಾಹನವು ₹11.95 ಲಕ್ಷಗಳ (ಎಕ್ಸ್ ಶೋರೂಂ) ಅತ್ಯಂತ ಆಕರ್ಷಕ ಆರಂಭಿಕ ಬೆಲೆಯಲ್ಲಿ ಲಭ್ಯವಿದೆ.
ಟಾಟಾ ಮೋಟಾರ್ಸ್ ಈ ಮೂಲಕ ತನ್ನ ಎಲೆಕ್ಟ್ರಿಕ್ ಸಣ್ಣ ಎಲೆಕ್ಟ್ರಿಕ್ ವಾಹನ ಪೋರ್ಟ್ ಫೋಲಿಯೋ ವಿಸ್ತರಿಸಿಕೊಂಡಿದೆ. ಈ ಹೊಸ ಪಿಕಪ್, ವಿಶ್ವಾಸಾರ್ಹ ಇಂಟ್ರಾ ಪ್ಲಾಟ್ ಫಾರ್ಮ್ ನ ಶಕ್ತಿ ಮತ್ತು ಉದ್ದೇಶಪೂರ್ವಕವಾಗಿ ರೂಪಿಸಲಾದ ಎಲೆಕ್ಟ್ರಿಕ್ ವಿನ್ಯಾಸವನ್ನು ಹೊಂದಿದೆ. ಇದು ಭಾರತದ ವಿಕಸನಗೊಳ್ಳುತ್ತಿರುವ ಸರಕು ಸಾಗಣೆ ಅಗತ್ಯಗಳಿಗೆ ನಂಬಿಕಸ್ಥ ಮತ್ತು ಹೆಚ್ಚಿನ ಲಾಭ ನೀಡುವ ಉತ್ಪನ್ನವಾಗಿದೆ.
ಟಾಟಾ ಇಂಟ್ರಾ ಇವಿ ಪಿಕಪ್ ಅನ್ನು ಬಿಡುಗಡೆ ಮಾಡಿ ಮಾತನಾಡಿದ ಟಾಟಾ ಮೋಟಾರ್ಸ್ ಲಿಮಿಟೆಡ್ನ ಮ್ಯಾನೇಜಿಂಗ್ ಡೈರೆಕ್ಟರ್ ಮತ್ತು ಸಿಇಒ ಶ್ರೀ ಗಿರೀಶ್ ವಾಗ್ ಅವರು, “ಹಸಿರು ಸಾರಿಗೆಯ ಕಡೆಗಿನ ನಮ್ಮ ಬದ್ಧತೆಯು ಭಾರತದ ವೈವಿಧ್ಯಮಯ ವಾಣಿಜ್ಯ ಸಾರಿಗೆ ಅಗತ್ಯಗಳಿಗೆ ಸೂಕ್ತವಾದ ಮತ್ತು ಸುಸ್ಥಿರ ಉತ್ಪನ್ನಗಳನ್ನು ಒದಗಿಸುವುದರ ಮೇಲೆ ಕೇಂದ್ರೀಕೃತವಾಗಿದೆ. ನಮ್ಮ ಎಲೆಕ್ಟ್ರಿಕ್ ಮಿನಿ- ಟ್ರಕ್ ಗಳಿಗೆ ಸಿಕ್ಕ ಭರ್ಜರಿ ಪ್ರತಿಕ್ರಿಯೆ ಮತ್ತು ದೇಶದ 10 ನಗರಗಳಲ್ಲಿ ಯಶಸ್ವಿಯಾಗಿ ಸಂಚರಿಸುತ್ತಿರುವ ಎಲೆಕ್ಟ್ರಿಕ್ ಬಸ್ ಗಳ ಯಶಸ್ಸಿನ ನಂತರ, ನಾವು ಈ ವರ್ಷದ ಆರಂಭದಲ್ಲಿ ಮುಂದಿನ ಪೀಳಿಗೆಯ ಎಲೆಕ್ಟ್ರಿಕ್ ಟ್ರಕ್ ಗಳನ್ನು ಪರಿಚಯಿಸಿದ್ದೆವು. ಇದೀಗ ಎಲೆಕ್ಟ್ರಿಕ್ ಪಿಕಪ್ ಗಳನ್ನು ಬಿಡುಗಡೆ ಮಾಡುವ ಮೂಲಕ ಮತ್ತೊಂದು ಹೆಜ್ಜೆ ಮುಂದೆ ಇಟ್ಟಿದ್ದೇವೆ. ಈ ಪ್ರಗತಿಯ ಮೂಲಕ ಟಾಟಾ ಮೋಟಾರ್ಸ್ ಎಲ್ಲಾ ವಿಭಾಗಗಳಲ್ಲಿ ದೇಶದ ಅತ್ಯಂತ ಸಮಗ್ರವಾದ ಎಲೆಕ್ಟ್ರಿಕ್ ವಾಣಿಜ್ಯ ವಾಹನ ಪೋರ್ಟ್ ಫೋಲಿಯೋವನ್ನು ಹೊಂದಿದೆ. ಸರ್ಕಾರದ ಪ್ರಗತಿಪರ ನೀತಿಗಳು ಮತ್ತು ಗ್ರಾಹಕರು, ಪಾಲುದಾರರು ಹಾಗೂ ಪೂರೈಕೆದಾರರ ಬಲಿಷ್ಠ ಸಹಯೋಗವು ಈ ಬೆಳವಣಿಗೆಗೆ ಕಾರಣವಾಗಿದ್ದು, ಭಾರತವು ಸ್ವಚ್ಛ ಮತ್ತು ಸುಸ್ಥಿರ ಸಾರಿಗೆಯತ್ತ ವೇಗವಾಗಿ ಸಾಗಲು ಸಹಕಾರಿಯಾಗಿದೆ,” ಎಂದು ತಿಳಿಸಿದರು.
ವಾಸ್ತವಿಕ ಕಾರ್ಯಾಚರಣೆಗಳ ಆಳವಾದ ಒಳನೋಟಗಳನ್ನು ಬಳಸಿಕೊಂಡು ರೂಪಿಸಲಾದ ಮತ್ತು ಕಠಿಣ ಕೆಲಸದ ಕಾರಣಗಳಿಗಾಗಿ ಎಂಜಿನಿಯರಿಂಗ್ ಮಾಡಲಾದ ಈ ಇಂಟ್ರಾ ಇವಿ ಪಿಕಪ್, ದೇಶದ ಅತ್ಯಂತ ಬಹುಮುಖ ಪಿಕಪ್ ಗಳಲ್ಲಿ ಒಂದಾಗಿದೆ. ಇದು ನಿರ್ವಾಹಕರಿಗೆ ಹೆಚ್ಚಿನ ಭಾರವನ್ನು ಸಾಗಿಸಲು, ದೀರ್ಘ ಪ್ರಯಾಣದ ಮಾರ್ಗಗಳಲ್ಲಿ ಚಲಿಸಲು ಮತ್ತು ಹೆಚ್ಚಿನ ಆತ್ಮವಿಶ್ವಾಸದೊಂದಿಗೆ ಕಾರ್ಯನಿರ್ವಹಿಸಲು ಅನುವು ಮಾಡಿಕೊಡುತ್ತದೆ. ಇದರೊಂದಿಗೆ ಕಡಿಮೆ ನಿರ್ವಹಣಾ ವೆಚ್ಚ ಮತ್ತು ಪರಿಸರದ ಮೇಲಿನ ಕಡಿಮೆ ಹಾನಿಯ ಪ್ರಯೋಜನಗಳೂ ಲಭ್ಯವಾಗಲಿವೆ.
ಟಾಟಾ ಇಂಟ್ರಾ ಇವಿ ಪಿಕಪ್ ಕುರಿತು ಮಾತನಾಡಿದ ಟಾಟಾ ಮೋಟಾರ್ಸ್ ಲಿಮಿಟೆಡ್ ನ ಎಸ್ಸಿವಿಪಿಯು ವಿಭಾಗದ ವೈಸ್ ಪ್ರೆಸಿಡೆಂಟ್ ಮತ್ತು ಬಿಸಿನೆಸ್ ಹೆಡ್ ಆದ ಶ್ರೀ ಪಿನಾಕಿ ಹಲ್ದಾರ್ ಅವರು, “ಸಂಪೂರ್ಣ ನೂತನ ಇಂಟ್ರಾ ಇವಿ ಪಿಕಪ್ ಅನ್ನು ಗಳಿಕೆಯ ಸಾಮರ್ಥ್ಯ ಮತ್ತು ದೈನಂದಿನ ಬಳಕೆಯ ಮೇಲೆ ಗಮನಹರಿಸಿ ಅಭಿವೃದ್ಧಿಪಡಿಸಲಾಗಿದೆ. ಈ ವಿಭಾಗದಲ್ಲೇ ಅತ್ಯಂತ ಹೆಚ್ಚಿನ ಪೇಲೋಡ್ ಸಾಮರ್ಥ್ಯಗಳಲ್ಲಿ ಒಂದನ್ನು ಹೊಂದಿರುವ ಈ ಪಿಕಪ್, ಬಲಿಷ್ಠ ಕಾರ್ಯಕ್ಷಮತೆ, ದೀರ್ಘ ರೇಂಜ್ ಮತ್ತು ಹೆಚ್ಚಿನ ಚಾಲನಾ ಸಮಯವನ್ನು ಅತ್ಯಂತ ಸ್ಪರ್ಧಾತ್ಮಕ ಬೆಲೆಯಲ್ಲಿ ನೀಡುತ್ತದೆ. ಇದರ ಆರಾಮದಾಯಕ ಮತ್ತು ಕ್ರಾಶ್- ಟೆಸ್ಟ್ ಮಾಡಲಾದ ಕ್ಯಾಬಿನ್, ಕಾರಿನಂತಹ ಚಾಲನಾ ಅನುಭವ ಮತ್ತು ಆಲೋಚನಾತ್ಮಕವಾಗಿ ಅಳವಡಿಸಲಾದ ಫೀಚರ್ ಗಳು ಸುದೀರ್ಘ ಕೆಲಸದ ಅವಧಿಯಲ್ಲಿ ಚಾಲಕರ ಆಯಾಸವನ್ನು ಕಡಿಮೆ ಮಾಡಲು ಮತ್ತು ಉತ್ಪಾದಕತೆಯನ್ನು ಸುಧಾರಿಸಲು ವಿನ್ಯಾಸಗೊಳಿಸಲಾಗಿದೆ. ಸ್ವಚ್ಛ ತಂತ್ರಜ್ಞಾನಗಳ ಅಳವಡಿಕೆ ವೇಗವಾಗುತ್ತಿದ್ದಂತೆ, ಟಾಟಾ ಮೋಟಾರ್ಸ್ ಉದ್ಯಮದ ಮಾನದಂಡಗಳನ್ನು ಎತ್ತರಿಸಲು ಮತ್ತು ಎಲೆಕ್ಟ್ರಿಕ್ ಕಾರ್ಗೋ ಸಾರಿಗೆಯನ್ನು ವ್ಯವಹಾರಗಳಿಗೆ ಪ್ರಾಯೋಗಿಕ ಹಾಗೂ ವಿಶ್ವಾಸಾರ್ಹ ಆಯ್ಕೆಯನ್ನಾಗಿ ಮಾಡಲು ಬದ್ಧವಾಗಿದೆ” ಎಂದು ಹೇಳಿದರು.
ಗಳಿಕೆಗಾಗಿ ವಿನ್ಯಾಸ, ಬಾಳಿಕೆಗಾಗಿ ನಿರ್ಮಾಣ
ಇಂಟ್ರಾ ಇವಿ ಪಿಕಪ್ ನ ಪ್ರಮುಖ ಉದ್ದೇಶವು ಉತ್ಪಾದಕತೆ ಮತ್ತು ಲಾಭದಾಯಕತೆಯ ಮೇಲೆ ಕೇಂದ್ರೀಕೃತವಾಗಿದೆ. 1,750 ಕೆಜಿ ಪೇಲೋಡ್ ಸಾಮರ್ಥ್ಯ ಮತ್ತು 10 ಅಡಿ 2 ಇಂಚಿನವರೆಗೆ ಉದ್ದನೆಯ ಲೋಡ್ ಬಾಡಿ ಆಯ್ಕೆಗಳೊಂದಿಗೆ ಲಭ್ಯವಿರುವ ಈ ವಾಹನವು ಎಫ್ಎಮ್ಸಿಜಿ, ಇ-ಕಾಮರ್ಸ್, ಕೋಲ್ಡ್- ಚೈನ್, ಕಸ ನಿರ್ವಹಣೆ, ಎಲ್ಪಿಜಿ ಮತ್ತು ಡೈರಿ ವಿತರಣೆಯಂತಹ ವ್ಯಾಪಕ ಶ್ರೇಣಿಯ ಉದ್ದೇಶಗಳಿಗೆ ಪೂರಕವಾಗಿದೆ. ಇದು ಪ್ರತಿ ಟ್ರಿಪ್ ನಲ್ಲಿ ಹೆಚ್ಚಿನ ಭಾರ ಸಾಗಿಸಲು ಮತ್ತು ಆಸ್ತಿಯ ಉತ್ತಮ ಬಳಕೆಗೆ ಅನುವು ಮಾಡಿಕೊಡುತ್ತದೆ.
230 ಎನ್ಎಂ ಪೀಕ್ ಟಾರ್ಕ್ ಉತ್ಪಾದಿಸುವ 72 ಕೆಡಬ್ಲ್ಯೂ ಎಲೆಕ್ಟ್ರಿಕ್ ಮೋಟಾರ್, ಪೂರ್ಣ ಲೋಡ್ ನಲ್ಲೂ ಬಲಿಷ್ಠ ಎಳೆಯುವ ಶಕ್ತಿಯನ್ನು ಹೊಂದಿದೆ. ಹಾಗೆಯೇ, 23% ಗ್ರೇಡೇಬಿಲಿಟಿಯು ಕಠಿಣ ಭೂಪ್ರದೇಶಗಳಲ್ಲಿಯೂ ಸುಗಮ ಸಂಚಾರಕ್ಕೆ ನೆರವಾಗುತ್ತದೆ. ಭಾರತೀಯ ಹವಾಮಾನ ಮತ್ತು ಬಳಕೆಯ ಪರಿಸ್ಥಿತಿಗಳಿಗಾಗಿ ವಿನ್ಯಾಸಗೊಳಿಸಲಾದ 28.2 kWh ಸಾಮರ್ಥ್ಯದ, ಐಪಿ67-ರೇಟೆಡ್ ಬ್ಯಾಟರಿಯು ಒಂದು ಬಾರಿ ಚಾರ್ಜ್ ಮಾಡಿದರೆ 211 ಕಿಮೀ ಪ್ರಮಾಣಿತ ರೇಂಜ್ ಅನ್ನು ಒದಗಿಸುತ್ತದೆ. ಇದು ದಿನವಿಡೀ ವಿವಿಧ ಕೆಲಸಗಳನ್ನು ನಡೆಸಲು ಅನುವು ಮಾಡಿಕೊಡುತ್ತದೆ. ಸಿಸಿಎಸ್2 ಚಾರ್ಜರ್ ಮೂಲಕ ಲಭ್ಯವಿರುವ ಫಾಸ್ಟ್ ಚಾರ್ಜಿಂಗ್ ಸೌಲಭ್ಯವು ಸುಮಾರು 55 ನಿಮಿಷಗಳಲ್ಲಿ 10-80% ಚಾರ್ಜಿಂಗ್ ಮಾಡಲು ಅನುವು ಮಾಡಿಕೊಡುತ್ತದೆ, ಇದು ವಾಹನದ ಚಾಲನಾ ಸಮಯವನ್ನು ಹೆಚ್ಚಿಸುತ್ತದೆ.
6 ವರ್ಷ ಅಥವಾ 2 ಲಕ್ಷ ಕಿಮೀ ಹೆಚ್ವಿ ಬ್ಯಾಟರಿ ವಾರಂಟಿಯ ಬೆಂಬಲ ಹೊಂದಿರುವ ಇಂಟ್ರಾ ಇವಿ ಪಿಕಪ್, ದೀರ್ಘಾವಧಿಯ ವಿಶ್ವಾಸಾರ್ಹ ಕಾರ್ಯಕ್ಷಮತೆಯನ್ನು ನೀಡಲು ವಿನ್ಯಾಸಗೊಳಿಸಲಾಗಿದೆ. ಇದು ಎಲೆಕ್ಟ್ರಿಕ್ ವಾಹನ ಕಾರ್ಯಾಚರಣೆಗಳಲ್ಲಿ ನಿಶ್ಚಿತತೆ ಮತ್ತು ನೆಮ್ಮದಿಯನ್ನು ತರುತ್ತದೆ.
ಸುರಕ್ಷಿತ ಮತ್ತು ಹೆಚ್ಚು ದಕ್ಷ ಕಾರ್ಯಾಚರಣೆಗಾಗಿ ಸ್ಮಾರ್ಟ್ ತಂತ್ರಜ್ಞಾನ
ಇಂಟ್ರಾ ಇವಿ ವಿನ್ಯಾಸದಲ್ಲಿ ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ಇದರಲ್ಲಿರುವ ಪ್ರತ್ಯೇಕ ಎಲೆಕ್ಟ್ರಾನಿಕ್ ಬ್ರೇಕಿಂಗ್ ಸಿಸ್ಟಮ್ ವಾಹನದ ಸ್ಥಿರತೆ ಮತ್ತು ಬ್ರೇಕಿಂಗ್ ದಕ್ಷತೆಯನ್ನು ಹೆಚ್ಚಿಸುತ್ತದೆ. ಜೊತೆಗೆ, ಮೂರು ಹಂತದ ರೀಜೆನೆರೇಟಿವ್ ಬ್ರೇಕಿಂಗ್ ವ್ಯವಸ್ಥೆಯು ವಾಹನದ ವೇಗ ತಗ್ಗಿದಾಗ ಶಕ್ತಿಯನ್ನು ಮರುಪೂರಣ ಮಾಡಲು ಸಹಾಯ ಮಾಡುತ್ತದೆ, ಇದು ವಾಹನದ ನೈಜ ಚಾಲನಾ ರೇಂಜ್ ಅನ್ನು ಹೆಚ್ಚಿಸಲು ಸಹಕಾರಿಯಾಗಿದೆ.
ಇಂಟ್ರಾ ಇವಿ ವಾಹನವು ‘ಟಾಟಾ ಮೋಟಾರ್ಸ್ ಫ್ಲೀಟ್ ಎಡ್ಜ್’ ತಂತ್ರಜ್ಞಾನದೊಂದಿಗೆ ಬರುತ್ತದೆ. ಇದು ವಾಹನದ ನೈಜ ಸಮಯದ ಟ್ರ್ಯಾಕಿಂಗ್, ವಾಹನದ ಆರೋಗ್ಯದ ಮೇಲ್ವಿಚಾರಣೆ ಮತ್ತು ಮುನ್ನೆಚ್ಚರಿಕೆಯ ನಿರ್ವಹಣಾ ಒಳನೋಟಗಳನ್ನು ನೀಡುತ್ತದೆ. ಇದು ವಾಹನ ಮಾಲೀಕರಿಗೆ ವಾಹನದ ಚಾಲನಾ ಸಮಯವನ್ನು ಹೆಚ್ಚಿಸಲು, ವೆಚ್ಚವನ್ನು ನಿರ್ವಹಿಸಲು ಮತ್ತು ಹೆಚ್ಚಿನ ಪಾರದರ್ಶಕತೆಯೊಂದಿಗೆ ಕಾರ್ಯನಿರ್ವಹಿಸಲು ಸಹಾಯ ಮಾಡುತ್ತದೆ.
ಉತ್ಪಾದಕತೆಗೆ ಪೂರಕವಾದ ಆರಾಮದಾಯಕ ವಿನ್ಯಾಸ
ಚಾಲಕರು ಸ್ಟೀರಿಂಗ್ ಹಿಡಿದು ದೀರ್ಘಕಾಲ ಕಳೆಯುವುದನ್ನು ಗಮನದಲ್ಲಿಟ್ಟುಕೊಂಡು, ಇಂಟ್ರಾ ಇವಿ ಪಿಕಪ್ ಅನ್ನು ವಾಕ್-ಥ್ರೂ ಕ್ಯಾಬಿನ್, ಕಾರಿನಂತಹ ಎರ್ಗೋನಾಮಿಕ್ಸ್ ಮತ್ತು ಎಲೆಕ್ಟ್ರಿಕ್ ಪವರ್ ಅಸಿಸ್ಟೆಡ್ ಸ್ಟೀರಿಂಗ್ (ಇಪಿಎಎಸ್) ನೊಂದಿಗೆ ಸಜ್ಜುಗೊಳಿಸಲಾಗಿದೆ. ಇದು ಸ್ಟೀರಿಂಗ್ ತಿರುಗಿಸುವ ಶ್ರಮವನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ. ಎಲೆಕ್ಟ್ರಿಕ್ ಡ್ರೈವ್ ಟ್ರೇನ್ ನಿಂದಾಗಿ ವಾಹನದಲ್ಲಿ ಶಬ್ದ ಮತ್ತು ಕಂಪನಗಳು ಅತ್ಯಂತ ಕಡಿಮೆ ಇರುವುದರಿಂದ ಕ್ಯಾಬಿನ್ ಒಳಗಿನ ಪರಿಸರವು ಶಾಂತವಾಗಿರುತ್ತದೆ. ಇದು ಚಾಲಕರ ಆಯಾಸವನ್ನು ಕಡಿಮೆ ಮಾಡಿ, ಅವರ ಏಕಾಗ್ರತೆ, ಸೌಕರ್ಯ ಮತ್ತು ಒಟ್ಟಾರೆ ಯೋಗಕ್ಷೇಮಕ್ಕೆ ಬೆಂಬಲ ನೀಡುತ್ತದೆ.
ಅಡೆತಡೆಗಳನ್ನು ನಿವಾರಿಸುವ ಪರಿಸರ ವ್ಯವಸ್ಥೆ
ಇಂಟ್ರಾ ಇವಿ ಪಿಕಪ್ ಗೆ ಟಾಟಾ ಮೋಟಾರ್ಸ್ ನ ವಿಸ್ತಾರವಾದ ಎಲೆಕ್ಟ್ರಿಕ್ ವಾಹನ ಪರಿಸರ ವ್ಯವಸ್ಥೆಯ ಬೆಂಬಲವಿದೆ. ಇದು ದೇಶಾದ್ಯಂತ 25,000ಕ್ಕೂ ಹೆಚ್ಚು ಚಾರ್ಜಿಂಗ್ ಪಾಯಿಂಟ್ ಗಳು, 200ಕ್ಕೂ ಹೆಚ್ಚು ಮೀಸಲಾದ ಇವಿ ಸೇವಾ ಕೇಂದ್ರಗಳು ಮತ್ತು ಸುಲಭವಾದ ಹೋಮ್ -ಚಾರ್ಜಿಂಗ್ ಪರಿಹಾರಗಳನ್ನು ಒಳಗೊಂಡಿದೆ. ಪ್ರಮುಖ ಬ್ಯಾಂಕುಗಳು ಮತ್ತು ಎನ್ಬಿಎಫ್ಸಿಗಳ ಸಹಭಾಗಿತ್ವದಲ್ಲಿ, ಟಾಟಾ ಮೋಟಾರ್ಸ್ ಕಸ್ಟಮೈಸ್ ಮಾಡಿದ ಹಣಕಾಸು ಆಯ್ಕೆಗಳು, ಸುಲಭ ಇಎಂಐ ಮತ್ತು ತ್ವರಿತ ಅನುಮೋದನೆಗಳನ್ನು ನೀಡುತ್ತಿದೆ. ಈ ಮೂಲಕ ಎಲೆಕ್ಟ್ರಿಕ್ ವಾಹನಗಳಿಗೆ ಬದಲಾಗುವುದನ್ನು ಸುಲಭಗೊಳಿಸುತ್ತಿದೆ.
ಏಸ್ ಇವಿ 1000 ಮತ್ತು ಏಸ್ ಪ್ರೊ ಇವಿ ಕುಟುಂಬಕ್ಕೆ ಈಗ ಇಂಟ್ರಾ ಇವಿ ಪಿಕಪ್ ಸೇರ್ಪಡೆಯಾಗಿದ್ದು, ಇದು ಟಾಟಾ ಮೋಟಾರ್ಸ್ ನ ಸಮಗ್ರ ಎಲೆಕ್ಟ್ರಿಕ್ ಸಣ್ಣ ವಾಣಿಜ್ಯ ವಾಹನಗಳ ಪೋರ್ಟ್ಫೋಲಿಯೋವನ್ನು ಮತ್ತಷ್ಟು ಬಲಪಡಿಸಿದೆ. ಭಾರತದ ಉದ್ಯಮಿಗಳು, ಚಾಲಕರು ಮತ್ತು ವಾಹನ ಮಾಲೀಕರು ಹೆಚ್ಚು ದಕ್ಷತೆಯ ವ್ಯವಹಾರಗಳನ್ನು ನಡೆಸಲು ಮತ್ತು ಸುಸ್ಥಿರ ಭವಿಷ್ಯವನ್ನು ನಿರ್ಮಿಸಲು ಪೂರಕವಾಗಿ ಈ ವಾಹನವನ್ನು ರೂಪಿಸಲಾಗಿದೆ.
