ಭಾರತ: ಫೆಬ್ರವರಿ 14:Indian Army ಅಗ್ನಿಪಥ್ ಯೋಜನೆಯಡಿ ಅಗ್ನಿವೀರ್ ನೇಮಕಾತಿ 2027ಕ್ಕಾಗಿ ನೋಂದಣಿ ಪ್ರಕ್ರಿಯೆಯನ್ನು ಫೆಬ್ರವರಿ 13ರಿಂದ ಆರಂಭಿಸಿದೆ. ದೇಶವ್ಯಾಪಿ ನಡೆಯುತ್ತಿರುವ ಈ ನೇಮಕಾತಿ ಅಭಿಯಾನದಲ್ಲಿ 25,000ಕ್ಕೂ ಹೆಚ್ಚು ಹುದ್ದೆಗಳು ಲಭ್ಯವಿದ್ದು, ಆಸಕ್ತ ಅಭ್ಯರ್ಥಿಗಳು joinindianarmy.nic.in ವೆಬ್ಸೈಟ್ ಮೂಲಕ ಅರ್ಜಿ ಸಲ್ಲಿಸಬಹುದು. ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ ಏಪ್ರಿಲ್ 1, 2026 ಆಗಿದೆ.
ಜನರಲ್ ಡ್ಯೂಟಿ, ಟೆಕ್ನಿಕಲ್, ಕ್ಲರ್ಕ್/ಸ್ಟೋರ್ಕೀಪರ್ ಟೆಕ್ನಿಕಲ್, ಟ್ರೇಡ್ಸ್ಮನ್, ಸೋಲ್ಜರ್ ಫಾರ್ಮಾ, ಟೆಕ್ನಿಕಲ್ ನರ್ಸಿಂಗ್ ಅಸಿಸ್ಟೆಂಟ್ ಹಾಗೂ ಮಹಿಳಾ ಮಿಲಿಟರಿ ಪೊಲೀಸ್ ಸೇರಿದಂತೆ ವಿವಿಧ ವಿಭಾಗಗಳಿಗೆ ನೇಮಕಾತಿ ನಡೆಯಲಿದೆ. ಆಯ್ಕೆ ಪ್ರಕ್ರಿಯೆಯಲ್ಲಿ ಕಂಪ್ಯೂಟರ್ ಆಧಾರಿತ ಪರೀಕ್ಷೆ, ನೇಮಕಾತಿ ರ್ಯಾಲಿ ಹಾಗೂ ದಾಖಲೆ ಪರಿಶೀಲನೆ ಹಂತಗಳು ಸೇರಿವೆ.
ಆನ್ಲೈನ್ ಪರೀಕ್ಷೆ ಜೂನ್ 1ರಿಂದ 15, 2026ರವರೆಗೆ ನಡೆಯಲಿದ್ದು, ಆಯ್ಕೆಯಾದ ಅಭ್ಯರ್ಥಿಗಳು ನಾಲ್ಕು ವರ್ಷಗಳ ಸೇವಾವಧಿಯನ್ನು ಪೂರ್ಣಗೊಳಿಸಬೇಕು. ಸೇವಾ ಅವಧಿ ಮುಗಿದ ನಂತರ ಅವರಿಗೆ ಕೌಶಲ್ಯ ಪ್ರಮಾಣಪತ್ರ ನೀಡಲಾಗುತ್ತದೆ.
ಅರ್ಹತೆ ಹುದ್ದೆಗಳ ಪ್ರಕಾರ 8ನೇ ತರಗತಿಯಿಂದ ಪದವಿ ಮಟ್ಟದವರೆಗೆ ನಿಗದಿಪಡಿಸಲಾಗಿದೆ. ಜುಲೈ 1, 2005 ರಿಂದ ಜುಲೈ 1, 2009ರ ನಡುವೆ ಜನಿಸಿದವರು ಅರ್ಜಿ ಸಲ್ಲಿಸಲು ಅರ್ಹರು. ಕನಿಷ್ಠ ಎತ್ತರ, ಎದೆ ಅಳತೆ ಸೇರಿದಂತೆ ದೈಹಿಕ ಮಾನದಂಡಗಳನ್ನು ಪೂರೈಸಬೇಕು.
ಅರ್ಜಿ ಸಲ್ಲಿಸಲು ಪ್ರತಿ ವಿಭಾಗಕ್ಕೆ ₹250 ಪರೀಕ್ಷಾ ಶುಲ್ಕ ಪಾವತಿಸಬೇಕು. ಆಯ್ಕೆಯಾದವರಿಗೆ ಮೊದಲ ವರ್ಷದಲ್ಲಿ ₹30,000ರಿಂದ ಆರಂಭವಾಗುವ ಮಾಸಿಕ ವೇತನ ನಾಲ್ಕನೇ ವರ್ಷಕ್ಕೆ ₹40,000ರವರೆಗೆ ಹೆಚ್ಚಳವಾಗಲಿದೆ.
