ಮುಂಬೈ ಫೆ. 03: ಬಹುನಿರೀಕ್ಷಿತ ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದದ ಪ್ರಕಾರ, ನವದೆಹಲಿ ರಷ್ಯಾದ ತೈಲ ಖರೀದಿಯನ್ನು ನಿಲ್ಲಿಸುವುದಕ್ಕೆ ಪ್ರತಿಯಾಗಿ ಭಾರತೀಯ ಸರಕುಗಳ ಮೇಲಿನ ಸುಂಕವನ್ನು ಶೇಕಡಾ 18 ಕ್ಕೆ ಇಳಿಸಲು ವಾಷಿಂಗ್ಟನ್ ಒಪ್ಪಿಕೊಂಡ ಪರಿಣಾಮ ಮಂಗಳವಾರ (ಫೆ.03) ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ ಆರಂಭಿಕ ವಹಿವಾಟಿನಲ್ಲಿ 2000ಕ್ಕೂ ಅಧಿಕ ಅಂಕಗಳ ಜಿಗಿತ ಕಂಡಿದೆ.
ಷೇರುಪೇಟೆ ಸಂವೇದಿ ಸೂಚ್ಯಂಕ 2,413 ಅಂಕಗಳ ಏರಿಕೆಯೊಂದಿಗೆ 84,079 ಅಂಕಗಳಲ್ಲಿ ವಹಿವಾಟು ಮುಂದುವರಿದಿದೆ. ಅದೇ ರೀತಿ ಎನ್ ಎಸ್ ಇ ನಿಫ್ಟಿ ಕೂಡಾ 734 ಅಂಕಗಳ ಜಿಗಿತದೊಂದಿಗೆ 25,823 ಅಂಕಗಳ ಗಡಿ ದಾಟಿದೆ.
ಷೇರುಪೇಟೆ ಆರಂಭದ ವಹಿವಾಟಿನಲ್ಲಿ ದಾಖಲೆ ಎಂಬಂತೆ ಸಂವೇದಿ ಸೂಚ್ಯಂಕ 3,648 ಅಂಕಗಳ ಜಿಗಿತದೊಂದಿಗೆ 85,314 ಅಂಕಗಳ ಗಡಿ ದಾಟಿತ್ತು. ಎನ್ ಎಸ್ ಇ ನಿಫ್ಟಿ 1,220 ಅಂಕಗಳ ಏರಿಕೆಯೊಂದಿಗೆ 26,308 ಅಂಕಗಳ ಮಟ್ಟ ತಲುಪಿತ್ತು.
ಸಂವೇದಿ ಸೂಚ್ಯಂಕ, ನಿಫ್ಟಿ ಏರಿಕೆ ಪರಿಣಾಮ ಅದಾನಿ ಎಂಟರ್ ಪ್ರೈಸಸ್, ಅದಾನಿ ಪೋರ್ಟ್ಸ್, ಜಿಯೋ ಫೈನಾನ್ಸ್, ಬಜಾಜ್, ಇಂಡಿಗೋ, ಶ್ರೀರಾಮ್ ಫೈನಾನ್ಸ್, ಸನ್ ಫಾರ್ಮಾ, ರಿಲಯನ್ಸ್, ಡಾ.ರೆಡ್ಡಿಸ್ ಷೇರುಗಳು ಲಾಭಗಳಿಸಿದೆ.
ಮತ್ತೊಂದೆಡೆ ಒಎನ್ ಜಿಸಿ, ನೆಸ್ಲಿ ಇಂಡಿಯಾ,ಕೋಲ್ ಇಂಡಿಯಾ, ಏಷಿಯನ್ ಪೇಂಟ್ಸ್, ಐಟಿಸಿ, ಬಿಇಎಲ್ ಷೇರುಗಳು ನಷ್ಟ ಕಂಡಿದೆ.
