ಮಣಿಪಾಲ, ನವೆಂಬರ್ 6, 2026: ಕಸ್ತೂರ್ಬಾ ಆಸ್ಪತ್ರೆ, ಮಣಿಪಾಲದ ನೇತ್ರಶಾಸ್ತ್ರ ವಿಭಾಗದಲ್ಲಿ ಕೆರಟೋಕೋನಸ್ ಕಾಯಿಲೆಯ ಪರೀಕ್ಷೆ ಮತ್ತು ಚಿಕಿತ್ಸೆಗಾಗಿ ಎರಡು ನೂತನ ವ್ಯವಸ್ಥೆಗಳನ್ನು ಅಳವಡಿಸಲಾಗಿದೆ. ಕೆರಟೋಕೋನಸ್, ಸಕಾಲದಲ್ಲಿ ಪತ್ತೆಹಚ್ಚಿ ಚಿಕಿತ್ಸೆ ನೀಡದಿದ್ದಲ್ಲಿ ದೃಷ್ಟಿಯ ಮೇಲೆ ಪರಿಣಾಮ ಬೀರಬಹುದಾದ ಕಣ್ಣಿನ ಸಮಸ್ಯೆಯಾಗಿದೆ. ANTERION ಕಾರ್ನಿಯಲ್ ಟೊಮೊಗ್ರಫಿ ಮತ್ತು ಟೊಪೊಗ್ರಫಿ ಉಪಕರಣ ಹಾಗೂ CXL UVR ರ‍್ಯಾಪಿಡ್ ಕೊಲಾಜೆನ್ ಕ್ರಾಸ್-ಲಿಂಕಿಂಗ್ ವ್ಯವಸ್ಥೆ ಗಳನ್ನು ಉದ್ಘಾಟಿಸಲಾಯಿತು.
ಮಾಹೆ ಬೋಧನಾ ಆಸ್ಪತ್ರೆಗಳ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (ಸಿಒಒ) ಡಾ. ಸುಧಾಕರ್ ಕಂಟಿಪುಡಿ ಅವರು, ವಿಶ್ವ ಕೆರಟೋಕೋನಸ್ ದಿನದ ಹಿನ್ನೆಲೆಯಲ್ಲಿ ನೇತ್ರಶಾಸ್ತ್ರ ವಿಭಾಗದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಈ ಸೌಲಭ್ಯವನ್ನು ಉದ್ಘಾಟಿಸಿದರು. ಈ ಕಾಯಿಲೆಯ ಬಗ್ಗೆ ಹಾಗೂ ಶೀಘ್ರ ಪತ್ತೆಯ ಮಹತ್ವದ ಕುರಿತು ಜಾಗೃತಿ ಮೂಡಿಸುವ ಉದ್ದೇಶದಿಂದ ಪ್ರತಿ ವರ್ಷ ನವೆಂಬರ್ 10ರಂದು ವಿಶ್ವ ಕೆರಟೋಕೋನಸ್ ದಿನವನ್ನು ಆಚರಿಸಲಾಗುತ್ತದೆ. ಕಸ್ತೂರ್ಬಾ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ ಡಾ. ಅವಿನಾಶ್ ಶೆಟ್ಟಿ, ನೇತ್ರಶಾಸ್ತ್ರ ವಿಭಾಗದ ಮುಖ್ಯಸ್ಥ ಡಾ. ಯೋಗೀಶ್ ಕಾಮತ್, ಕಾರ್ನಿಯಾ ತಜ್ಞೆ ಡಾ. ದೀಕ್ಷಿತಾ ವಿ., ವಿಭಾಗದ ಬೋಧಕ ಸಿಬ್ಬಂದಿ, ವೈದ್ಯರು, ಸಿಬ್ಬಂದಿ ಹಾಗೂ ರೋಗಿಗಳು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.
ಕೆರಟೋಕೋನಸ್ ಕಾಯಿಲೆಯಲ್ಲಿ ಕಣ್ಣಿನ ಮುಂಭಾಗದ ಪಾರದರ್ಶಕ ಪದರವಾದ ಕಾರ್ನಿಯಾ ಕ್ರಮೇಣ ತೆಳುವಾಗಿ, ಹೊರಮುಖವಾಗಿ ಶಂಕುವಿನ ಆಕಾರಕ್ಕೆ ಉಬ್ಬುತ್ತದೆ. ಇದರಿಂದ ದೃಷ್ಟಿ ಮಸುಕಾಗುವುದು ಹಾಗೂ ವಿರೂಪಗೊಳ್ಳುವುದು ಕಂಡುಬರುತ್ತದೆ. ಈ ಸಮಸ್ಯೆ ಸಾಮಾನ್ಯವಾಗಿ ಹದಿಹರೆಯದಲ್ಲಿ ಆರಂಭವಾಗುತ್ತದೆ ಮತ್ತು ಕಾಲಕ್ರಮೇಣ ಉಲ್ಬಣಗೊಳ್ಳಬಹುದು. ಸಕಾಲಿಕ ಚಿಕಿತ್ಸೆಯು ದೃಷ್ಟಿ ಇನ್ನಷ್ಟು ಕ್ಷೀಣಿಸುವುದನ್ನು ತಡೆಯಲು ಸಹಾಯಕವಾಗುವುದರಿಂದ, ಶೀಘ್ರ ಪತ್ತೆ ಅತ್ಯಂತ ಮುಖ್ಯ.
ANTERION ಉಪಕರಣವು ಹೈ-ರೆಸಲ್ಯೂಶನ್ ಕಾರ್ನಿಯಲ್ ಟೊಮೊಗ್ರಫಿ ಮತ್ತು ಟೊಪೊಗ್ರಫಿಯನ್ನು ಸಂಯೋಜಿಸಿದ್ದು, ಕಾರ್ನಿಯಾದ ಆಕಾರ ಮತ್ತು ದಪ್ಪದ ವಿವರವಾದ ಮೌಲ್ಯಮಾಪನಕ್ಕೆ ನೆರವಾಗುತ್ತದೆ. ಇದರಿಂದ ನೇತ್ರತಜ್ಞರಿಗೆ ಆರಂಭಿಕ ಬದಲಾವಣೆಗಳನ್ನು ಗುರುತಿಸಲು, ಕಾಯಿಲೆಯ ಸ್ಥಿತಿಯನ್ನು ಕಾಲಕಾಲಕ್ಕೆ ಗಮನಿಸಲು ಹಾಗೂ ಚಿಕಿತ್ಸೆಯನ್ನು ಯೋಜಿಸಲು ಸಾಧ್ಯವಾಗುತ್ತದೆ. ಕಾರ್ನಿಯಲ್ ಕೊಲಾಜೆನ್ ಕ್ರಾಸ್-ಲಿಂಕಿಂಗ್, ಉಲ್ಬಣಗೊಳ್ಳುತ್ತಿರುವ ಕೆರಟೋಕೋನಸ್‌ಗೆ ಸ್ಥಾಪಿತ ಚಿಕಿತ್ಸಾ ವಿಧಾನವಾಗಿದೆ. ಇದರಲ್ಲಿ ರೈಬೋಫ್ಲೇವಿನ್ (ವಿಟಮಿನ್ ಬಿ2) ಕಣ್ಣಿನ ಹನಿಗಳು ಹಾಗೂ ನಿಯಂತ್ರಿತ ಅಲ್ಟ್ರಾವಯಲೆಟ್ ಬೆಳಕನ್ನು ಬಳಸಿ ಕಾರ್ನಿಯಾದ ಕೊಲಾಜೆನ್ ನಾರುಗಳನ್ನು ಬಲಪಡಿಸಲಾಗುತ್ತದೆ. ಸೂಕ್ತ ರೋಗಿಗಳಲ್ಲಿ ಕಾಯಿಲೆಯ ಉಲ್ಬಣವನ್ನು ನಿಧಾನಗೊಳಿಸುವುದು ಅಥವಾ ತಡೆಯುವುದು ಈ ಚಿಕಿತ್ಸೆಯ ಉದ್ದೇಶ. ರ‍್ಯಾಪಿಡ್ ಪ್ರೋಟೋಕಾಲ್‌ನಿಂದ ಚಿಕಿತ್ಸೆಯ ಅವಧಿ ಕಡಿಮೆಯಾಗುತ್ತದೆ. ಈ ಎರಡೂ ವ್ಯವಸ್ಥೆಗಳು ಲಭ್ಯವಾಗಿರುವುದರಿಂದ ಕಾರ್ನಿಯಾ ಪರೀಕ್ಷೆ ಮತ್ತು ಕ್ರಾಸ್-ಲಿಂಕಿಂಗ್ ಚಿಕಿತ್ಸೆ ವಿಭಾಗದಲ್ಲೇ ದೊರೆಯುತ್ತವೆ. ಚಿಕಿತ್ಸೆಯ ಸೂಕ್ತತೆಯನ್ನು ಸಮಗ್ರ ಪರೀಕ್ಷೆಯ ನಂತರ ಚಿಕಿತ್ಸೆ ನೀಡುವ ನೇತ್ರತಜ್ಞರು ನಿರ್ಧರಿಸುತ್ತಾರೆ.
ಈ ಸಂದರ್ಭದಲ್ಲಿ ಮಾತನಾಡಿದ ಡಾ. ಸುಧಾಕರ್ ಕಂಟಿಪುಡಿ, “ಈ ನೂತನ ವ್ಯವಸ್ಥೆಗಳ ಸೇರ್ಪಡೆಯಿಂದ ನಮ್ಮ ನೇತ್ರಶಾಸ್ತ್ರ ವಿಭಾಗದಲ್ಲಿ ಕಾರ್ನಿಯಾ ಸಂಬಂಧಿತ ಸಮಸ್ಯೆಗಳ ಪರೀಕ್ಷೆ ಮತ್ತು ಚಿಕಿತ್ಸಾ ಸೌಲಭ್ಯಗಳು ಇನ್ನಷ್ಟು ಬಲಗೊಂಡಿವೆ. ವಿಶ್ವ ಕೆರಟೋಕೋನಸ್ ದಿನದ ಹಿನ್ನೆಲೆಯಲ್ಲಿ ಇವುಗಳನ್ನು ಉದ್ಘಾಟಿಸುತ್ತಿರುವುದು, ಈ ಕಾಯಿಲೆ ಹಾಗೂ ಶೀಘ್ರ ರೋಗನಿರ್ಣಯದ ಮಹತ್ವದ ಬಗ್ಗೆ ಜಾಗೃತಿ ಮೂಡಿಸಲು ಒಂದು ಅವಕಾಶವೂ ಆಗಿದೆ” ಎಂದು ಹೇಳಿದರು.
ಕಸ್ತೂರ್ಬಾ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ ಡಾ. ಅವಿನಾಶ್ ಶೆಟ್ಟಿ ಮಾತನಾಡಿ, “ಕೆರಟೋಕೋನಸ್ ಹೆಚ್ಚಾಗಿ ಹದಿಹರೆಯದಲ್ಲಿ ಆರಂಭವಾಗುತ್ತದೆ. ಕನ್ನಡಕದ ಪವರ್ ಆಗಾಗ ಬದಲಾಗುವುದು, ದೃಷ್ಟಿ ಮಸುಕಾಗುವುದು ಅಥವಾ ವಿರೂಪಗೊಳ್ಳುವುದು ಮುಂತಾದ ಆರಂಭಿಕ ಲಕ್ಷಣಗಳನ್ನು ಹೆಚ್ಚಿನವರು ಕೇವಲ ಹೊಸ ಕನ್ನಡಕದ ಅಗತ್ಯವೆಂದು ತಪ್ಪಾಗಿ ಭಾವಿಸುತ್ತಾರೆ. ಶೀಘ್ರ ರೋಗನಿರ್ಣಯದಿಂದ ಸಕಾಲಿಕ ಚಿಕಿತ್ಸೆ ಸಾಧ್ಯವಾಗುವುದರಿಂದ, ಇಂತಹ ಲಕ್ಷಣಗಳನ್ನು ಗಮನಿಸುವ ಪೋಷಕರು ಹಾಗೂ ಯುವಜನರು ನೇತ್ರತಜ್ಞರನ್ನು ಸಂಪರ್ಕಿಸಬೇಕು” ಎಂದು ಸಲಹೆ ನೀಡಿದರು.
ನೇತ್ರಶಾಸ್ತ್ರ ವಿಭಾಗದ ವತಿಯಿಂದ ವಂದನಾರ್ಪಣೆಯೊಂದಿಗೆ ಕಾರ್ಯಕ್ರಮ ಮುಕ್ತಾಯಗೊಂಡಿತು. ಈ ನೂತನ ವ್ಯವಸ್ಥೆಗಳ ಸೇರ್ಪಡೆಯೊಂದಿಗೆ, ಕೆರಟೋಕೋನಸ್ ಹಾಗೂ ವಿಶೇಷವಾಗಿ ಮಕ್ಕಳು ಮತ್ತು ಯುವಜನರಲ್ಲಿ ನಿಯಮಿತ ಕಣ್ಣಿನ ತಪಾಸಣೆಯ ಮಹತ್ವದ ಕುರಿತು ಜಾಗೃತಿ ಮೂಡಿಸುವ ತನ್ನ ಪ್ರಯತ್ನಗಳನ್ನು ವಿಭಾಗವು ಮುಂದುವರಿಸಲಿದೆ.
