ಮಂಗಳೂರು: ನಗರದ ವೆಲೆನ್ಸಿಯಾ ಜಂಕ್ಷನ್ ಸಮೀಪ ನಿಲ್ಲಿಸಿದ್ದ KTM 200 Duke ಬೈಕ್ ಕಳವಾಗಿರುವ ಘಟನೆ ವರದಿಯಾಗಿದೆ.
ಫಾದರ್ ಮುಲ್ಲರ್ ಕಾಲೇಜಿನಲ್ಲಿ ವ್ಯಾಸಂಗ ಮಾಡುತ್ತಿರುವ ದೀಪೇಶ್ ಚೌಧರಿ ಅವರು ತಮ್ಮ ಅಣ್ಣನ ಹೆಸರಿನ KA-09-HY-6281 ನೋಂದಣಿ ಸಂಖ್ಯೆಯ ಬೈಕ್‌ನ್ನು ಕಳೆದ ನಾಲ್ಕು ವರ್ಷಗಳಿಂದ ಬಳಸುತ್ತಿದ್ದರು.
ಅಕ್ಟೋಬರ್ 12ರಂದು ರಾತ್ರಿ ಸುಮಾರು 9.30ರ ವೇಳೆಗೆ ಡಾನ್ ಬಾಸ್ಕೋ ಹಾಸ್ಟೆಲ್‌ನಿಂದ ಬೈಕ್ ತಂದು, ಹಾಸ್ಟೆಲ್ ಮುಂಭಾಗದ ವೆಲೆನ್ಸಿಯಾ ಜಂಕ್ಷನ್ ಕಡೆಗೆ ಹೋಗುವ ಸಾರ್ವಜನಿಕ ರಸ್ತೆಯಲ್ಲಿ ನಿಲ್ಲಿಸಿದ್ದರು.
ಮರುದಿನ ಬೆಳಿಗ್ಗೆ ಸುಮಾರು 11.30ರ ವೇಳೆಗೆ ಬಂದು ನೋಡಿದಾಗ ಬೈಕ್ ಕಾಣೆಯಾಗಿತ್ತು.
ಈ ಕುರಿತು ತಮ್ಮ ಅಣ್ಣನಿಗೆ ಮಾಹಿತಿ ನೀಡಿ, ವೆಲೆನ್ಸಿಯಾ ಪರಿಸರ ಹಾಗೂ ಮಂಗಳೂರು ನಗರದ ವಿವಿಧೆಡೆ ಹುಡುಕಾಟ ನಡೆಸಿದರೂ ಬೈಕ್ ಪತ್ತೆಯಾಗಿಲ್ಲ. ಅಕ್ಟೋಬರ್ 12ರ ರಾತ್ರಿ 9.30ರಿಂದ ಅಕ್ಟೋಬರ್ 13ರ ಬೆಳಿಗ್ಗೆ 9.30ರ ನಡುವಿನ ಅವಧಿಯಲ್ಲಿ ಅಪರಿಚಿತರು ಬೈಕ್ ಕಳವು ಮಾಡಿಕೊಂಡು ಹೋಗಿರುವುದಾಗಿ ದೂರಿನಲ್ಲಿ ತಿಳಿಸಲಾಗಿದೆ.
ಕಳವಾದ ಬೈಕ್‌ನ ಅಂದಾಜು ಮೌಲ್ಯ ₹70,000 ಎಂದು ಹೇಳಲಾಗಿದ್ದು, ಈ ಕುರಿತು ಮಂಗಳೂರು ದಕ್ಷಿಣ ಪೊಲೀಸ್ ಠಾಣೆಯಲ್ಲಿ ದೂರು ನೀಡಲಾಗಿದೆ.
