ಮಣಿಪಾಲ, ಅಕ್ಟೋಬರ್ 15, 2026: ಮೈಸೂರಿನ ಮಹಾರಾಜ ಒಳಾಂಗಣ ಕ್ರೀಡಾಂಗಣದಲ್ಲಿ ಇತ್ತೀಚೆಗೆ ನಡೆದ ದಸರಾ ಕ್ರೀಡಾಕೂಟ–ಸಿಎಂ ಕಪ್ 2026ರಲ್ಲಿ ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜುಕೇಶನ್‌ನ (ಮಾಹೆ) ಮಣಿಪಾಲ ಕಾಲೇಜ್ ಆಫ್ ಹೆಲ್ತ್ ಪ್ರೊಫೆಷನ್ಸ್‌ನ (ಎಂಸಿಎಚ್‌ಪಿ) ವಿದ್ಯಾರ್ಥಿನಿಯರು ಕರಾಟೆ ಸ್ಪರ್ಧೆಯಲ್ಲಿ ಚಿನ್ನ ಮತ್ತು ಕಂಚಿನ ಪದಕಗಳನ್ನು ಗೆದ್ದು ಗಮನಾರ್ಹ ಸಾಧನೆ ಮಾಡಿದ್ದಾರೆ.
ಮಹಿಳೆಯರ 50 ಕೆ.ಜಿ.ಗಿಂತ ಕಡಿಮೆ ತೂಕದ ವೈಯಕ್ತಿಕ ಕುಮಿತೆ ವಿಭಾಗದಲ್ಲಿ ಪ್ರಣುಷಾ ಚಿನ್ನದ ಪದಕ ಗೆದ್ದರೆ, ವೈಯಕ್ತಿಕ ಕಟಾ ವಿಭಾಗದಲ್ಲಿ ಶೆಫಾಲಿ ರಾಜೇಶ್ ರಾವ್ ಕಂಚಿನ ಪದಕ ತಮ್ಮದಾಗಿಸಿಕೊಂಡರು. ರಾಜ್ಯಮಟ್ಟದ ಈ ಕ್ರೀಡಾಕೂಟದಲ್ಲಿ ಇಬ್ಬರೂ ಕ್ರೀಡಾಪಟುಗಳು ಪ್ರದರ್ಶಿಸಿದ ಕೌಶಲ, ತಾಂತ್ರಿಕ ಪರಿಣತಿ ಮತ್ತು ಸ್ಪರ್ಧಾತ್ಮಕ ಮನೋಭಾವವು ಮಾಹೆಗೆ ಹೆಮ್ಮೆ ತಂದಿದೆ.
ಇಬ್ಬರೂ ಕ್ರೀಡಾಪಟುಗಳನ್ನು ಮಾಹೆ ಅಭಿನಂದಿಸಿದ್ದು, ಮುಂದಿನ ಕ್ರೀಡಾ ಪ್ರಯತ್ನಗಳಲ್ಲಿಯೂ ಯಶಸ್ಸು ದೊರೆಯಲಿ ಎಂದು ಮಾಹೆ ಹಾರೈಸುತ್ತದೆ.
