ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ವೈದ್ಯರು 15 ದಿನಗಳ ಹಸುಗೂಸಿನಲ್ಲಿದ್ದ ದೊಡ್ಡ ಮೆದುಳಿನ ಗೆಡ್ಡೆಯನ್ನು ಯಶಸ್ವಿಯಾಗಿ ತೆಗೆದುಹಾಕಿದ್ದಾರೆ.
ಶಸ್ತ್ರಚಿಕಿತ್ಸಕರು 15 ದಿನಗಳ ಹಸುಳೆಯಲ್ಲಿದ್ದ ದೊಡ್ಡದಾದ ತಲೆಬುರುಡೆಯೊಳಗಿನ ಗೆಡ್ಡೆಯನ್ನು ಸಂಪೂರ್ಣವಾಗಿ ತೆಗೆದುಹಾಕುವಲ್ಲಿ ಯಶಸ್ವಿಯಾದರು. ಮೂರು ವರ್ಷಗಳ ನಂತರ, ಆ ಮಗು ಆರೋಗ್ಯಕರ ನರಮಂಡಲದ ಬೆಳವಣಿಗೆಯನ್ನು ಹೊಂದಿದ್ದು, ಈಗ ಶಾಲಾಪೂರ್ವ ಶಿಕ್ಷಣಕ್ಕೆ (ಪ್ರಿಸ್ಕೂಲ್) ಸಿದ್ಧವಾಗಿದೆ.
ಮಣಿಪಾಲ, 24 ಸೆಪ್ಟೆಂಬರ್ 2026 — ಕೇವಲ 15 ದಿನಗಳ ಪ್ರಾಯದಲ್ಲಿದ್ದಾಗ ಮೆದುಳಿನ ಪ್ರಮುಖ ಶಸ್ತ್ರಚಿಕಿತ್ಸೆಗೆ ಒಳಗಾದ ಮಗುವೊಂದು ಇಂದು ಆರೋಗ್ಯವಂತ ಹಾಗೂ ಉತ್ಸಾಹಭರಿತ ಮೂರು ವರ್ಷದ ಬಾಲಕನಾಗಿ ಬೆಳೆದಿದ್ದು, ಶಾಲಾ ಪೂರ್ವ ಶಿಕ್ಷಣವನ್ನು (ಪ್ರಿಸ್ಕೂಲ್) ಪ್ರಾರಂಭಿಸಲು ಸಿದ್ಧನಾಗಿದ್ದಾನೆ. ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯಲ್ಲಿನ ಆರಂಭಿಕ ಹಂತದ ಚಿಕಿತ್ಸೆ, ವಿಶೇಷ ಶಸ್ತ್ರಚಿಕಿತ್ಸಾ ಪರಿಣತಿ ಮತ್ತು ವಿವಿಧ ವಿಭಾಗಗಳ ಸಮನ್ವಯದೊಂದಿಗೆ ನೀಡಲಾದ ಆರೈಕೆಯ ಫಲವಾಗಿ ಇದು ಸಾಧ್ಯವಾಗಿದೆ.
ತಲೆಯ ಗಾತ್ರವು ಗಮನಾರ್ಹವಾಗಿ ದೊಡ್ಡದಾಗಿದ್ದ ಸ್ಥಿತಿಯಲ್ಲಿ 15 ದಿನಗಳ ಪ್ರಾಯದ ಶಿಶುವನ್ನು ಆಸ್ಪತ್ರೆಗೆ ಕರೆತರಲಾಯಿತು; ಇದು ಯಾವುದಾದರೂ ಗಂಭೀರ ನರರೋಗದ ಸಮಸ್ಯೆಯಿರುವ ಕುರಿತು ತಕ್ಷಣದ ಆತಂಕವನ್ನು ಉಂಟುಮಾಡಿತು. ಮೆದುಳಿನ ಎಂಆರ್ಐ (MRI) ಸ್ಕ್ಯಾನ್ನಲ್ಲಿ ತಲೆಬುರುಡೆಯೊಳಗೆ ದೊಡ್ಡ ದ್ರವ್ಯರಾಶಿಯೊಂದು (mass) ಕಂಡುಬಂದಿದ್ದು, ಅದು ‘ಹೈ-ಗ್ರೇಡ್’ (ತೀವ್ರ ಸ್ವರೂಪದ) ಗೆಡ್ಡೆಯಾಗಿರುವ ಸಾಧ್ಯತೆಯನ್ನು ಬಲವಾಗಿ ಸೂಚಿಸುತ್ತಿತ್ತು. ಚಿಕಿತ್ಸೆ ನೀಡುತ್ತಿದ್ದ ವೈದ್ಯಕೀಯ ತಂಡಕ್ಕೆ ಇದರ ರೋಗನಿರ್ಣಯವು ಒಂದು ಅಸಾಧಾರಣ ಸವಾಲಾಗಿ ಪರಿಣಮಿಸಿತು: ಏಕೆಂದರೆ ರೋಗಿಯು ಕೇವಲ ಎರಡು ವಾರಗಳ ಹಸುಳೆಯಾಗಿದ್ದರೂ, ಆ ಗೆಡ್ಡೆಯು ಆಗಲೇ ಅತ್ಯಂತ ದೊಡ್ಡದಾಗಿತ್ತು.
ಯಾವುದೇ ಸಂದರ್ಭದಲ್ಲೂ ನವಜಾತ ಶಿಶುವಿಗೆ ಶಸ್ತ್ರಚಿಕಿತ್ಸೆ ನಡೆಸುವುದು ತಾಂತ್ರಿಕವಾಗಿ ಅತ್ಯಂತ ಸವಾಲಿನ ಕೆಲಸ; ಅದರಲ್ಲೂ ಇಷ್ಟು ದೊಡ್ಡ ಗಾತ್ರದ ಗೆಡ್ಡೆಯಿರುವಾಗ ಈ ಸವಾಲು ಇನ್ನಷ್ಟು ಹೆಚ್ಚಿರುತ್ತದೆ. ಈ ವಯಸ್ಸಿನ ಮಗುವಿನಲ್ಲಿ ರಕ್ತದ ಪ್ರಮಾಣವು ಬಹಳ ಕಡಿಮೆಯಿರುವುದರಿಂದ, ಸ್ವಲ್ಪವೇ ರಕ್ತ ನಷ್ಟವಾದರೂ ಅದು ಗಂಭೀರ ಪರಿಣಾಮಗಳನ್ನು ಬೀರಬಹುದು; ಹೀಗಾಗಿ, ಶಸ್ತ್ರಚಿಕಿತ್ಸೆ ನಡೆಸುವುದು ಹಾಗೂ ಆತಂಕಗೊಂಡಿರುವ ಪೋಷಕರಿಗೆ ಸೂಕ್ತ ಮಾಹಿತಿ ನೀಡಿ ಸಮಾಧಾನಪಡಿಸುವುದು – ಇವೆರಡೂ ಅತ್ಯಂತ ಕಠಿಣ ಕಾರ್ಯಗಳಾಗಿರುತ್ತವೆ. ಇದರಲ್ಲಿರುವ ಅಪಾಯಗಳ ಬಗ್ಗೆ ಹೆತ್ತವರಿಗೆ ಸಂಪೂರ್ಣ ಅರಿವು ಮೂಡಿಸಿದ ನಂತರ, ವೈದ್ಯಕೀಯ ತಂಡವು ಶಸ್ತ್ರಚಿಕಿತ್ಸೆಯನ್ನು ಮುಂದುವರಿಸಲು ನಿರ್ಧರಿಸಿತು.
ನಿರೀಕ್ಷೆಯಂತೆಯೇ ಈ ಶಸ್ತ್ರಚಿಕಿತ್ಸೆ ಅತ್ಯಂತ ಸವಾಲಿನದಾಗಿತ್ತು, ಆದರೂ ನರರೋಗ ಶಸ್ತ್ರಚಿಕಿತ್ಸಕರು ಗೆಡ್ಡೆಯನ್ನು ಸಂಪೂರ್ಣವಾಗಿ ತೆಗೆದುಹಾಕುವಲ್ಲಿ ಯಶಸ್ವಿಯಾದರು. ಶಸ್ತ್ರಚಿಕಿತ್ಸೆಯ ನಂತರ, ಮಗುವನ್ನು ಸೂಕ್ತ ಆರೈಕೆಗಾಗಿ ನವಜಾತ ಶಿಶುಗಳ ತೀವ್ರ ನಿಗಾ ಘಟಕಕ್ಕೆ (NICU) ಸ್ಥಳಾಂತರಿಸಲಾಯಿತು. ಆರಂಭದಲ್ಲಿ ಸವಾಲುಗಳಿದ್ದರೂ, ಮಗು ಚಿಕಿತ್ಸೆಗೆ ಉತ್ತಮವಾಗಿ ಸ್ಪಂದಿಸಿತು ಮತ್ತು ಚೇತರಿಕೆಯ ಸ್ಥಿರ ಲಕ್ಷಣಗಳನ್ನು ತೋರಿತು; ಅಂತಿಮವಾಗಿ, ಶಸ್ತ್ರಚಿಕಿತ್ಸೆ ನಡೆದ ಒಂದು ವಾರದ ನಂತರ ಮಗುವನ್ನು ಸ್ಥಿರವಾದ ಆರೋಗ್ಯ ಸ್ಥಿತಿಯಲ್ಲಿ ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಯಿತು.
ಆ ಮಗುವಿನ ನರಮಂಡಲದ ಬೆಳವಣಿಗೆ ಮತ್ತು ಒಟ್ಟಾರೆ ಬೆಳವಣಿಗೆಯನ್ನು ತಂಡವು ಸೂಕ್ಷ್ಮವಾಗಿ ಗಮನಿಸುತ್ತಾ, ನಿಯಮಿತವಾಗಿ ಪರಿಶೀಲನೆಗೆ ಒಳಪಡಿಸುತ್ತಾ ಬಂದಿದೆ. ಮೂರು ವರ್ಷಗಳ ನಂತರ, ಮಗು ಅತ್ಯುತ್ತಮ ಪ್ರಗತಿಯನ್ನು ಸಾಧಿಸಿದ್ದು, ಈಗ ತನ್ನ ಮುಂದಿನ ಮಹತ್ವದ ಹೆಜ್ಜೆಯಾದ ‘ಪ್ರಿಸ್ಕೂಲ್’ (ಪೂರ್ವ-ಪ್ರಾಥಮಿಕ ಶಾಲೆ) ಗೆ ಹೋಗಲು ಸಿದ್ಧವಾಗಿದೆ.
ನವಜಾತ ಶಿಶುಗಳು ಮತ್ತು ಮಕ್ಕಳಲ್ಲಿ ಮೆದುಳಿನ ಗೆಡ್ಡೆಗಳ ನಿರ್ವಹಣೆಗೆ ಶಸ್ತ್ರಚಿಕಿತ್ಸೆಗಿಂತ ಹೆಚ್ಚಿನದ್ದು ಅಗತ್ಯವಿದೆ. ಇದಕ್ಕೆ ನರಶಸ್ತ್ರಚಿಕಿತ್ಸೆ, ನವಜಾತ ಶಿಶುಶಾಸ್ತ್ರ, ಮಕ್ಕಳ ಆಂಕೊಲಾಜಿ, ತೀವ್ರ ನಿಗಾ ಮತ್ತು ಪುನಶ್ಚೇತನ ಸೇರಿದಂತೆ ಸಂಘಟಿತ, ಬಹು ಆಯಾಮ ತಂಡಗಳ ಪ್ರಯತ್ನಗಳು ಬೇಕಾಗುತ್ತವೆ. ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯಲ್ಲಿ, ಡಾ. ರಾಘವೇಂದ್ರ ನಾಯಕ್ ನೇತೃತ್ವದ ನರಶಸ್ತ್ರಚಿಕಿತ್ಸಾ ವಿಭಾಗವು, ಡಾ. ಶೀಲಾ ಎಸ್ ಮಥಾಯಿ ನೇತೃತ್ವದ ನವಜಾತ ಶಿಶು ಆರೈಕೆ ತಂಡ, ಡಾ. ವಾಸುದೇವ್ ಭಟ್ ನೇತೃತ್ವದ ಮಕ್ಕಳ ಆಂಕೊಲಾಜಿ ಸೇವೆಗಳು ಮತ್ತು ಸಮಗ್ರ ಪುನಶ್ಚೇತನ ಸೌಲಭ್ಯಗಳೊಂದಿಗೆ ಈ ಆರೈಕೆಯನ್ನು ಒದಗಿಸಲಾಗಿದೆ. ಬೃಹತ್ ಮೆದುಳಿನ ಗೆಡ್ಡೆಯನ್ನು ಎದುರಿಸುತ್ತಿರುವ 15 ದಿನಗಳ ಮಗುವಿನಿಂದ ಪೂರ್ವ ಪ್ರಾಥಮಿಕ ತರಗತಿ ಪ್ರವೇಶಿಸಲು ತಯಾರಿ ನಡೆಸುತ್ತಿರುವ ಹರ್ಷಚಿತ್ತದಿಂದ ಕೂಡಿದ ಮೂರು ವರ್ಷದ ಮಗುವಿನವರೆಗೆ, ಅವರ ಪ್ರಯಾಣವು ಆರಂಭಿಕ ರೋಗ ನಿರ್ಣಯ , ತಂಡದ ಕೆಲಸ, ಸ್ಥಿತಿಸ್ಥಾಪಕತ್ವ ಮತ್ತು ಭರವಸೆಗೆ ಸಾಕ್ಷಿಯಾಗಿದೆ.
ಈ ಪ್ರಕರಣದ ಕುರಿತು ಮಾತನಾಡುತ್ತಾ, ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯ ನರಶಸ್ತ್ರಚಿಕಿತ್ಸಾ ವಿಭಾಗದ ಪ್ರಾದ್ಯಾಪಕ ಮತ್ತು ಮುಖ್ಯಸ್ಥ ಡಾ. ರಾಘವೇಂದ್ರ ನಾಯಕ ಹೀಗೆ ಹೇಳಿದರು: “ನವಜಾತ ಶಿಶುವಿಗೆ ಶಸ್ತ್ರಚಿಕಿತ್ಸೆ ಮಾಡುವುದು ತಾಂತ್ರಿಕವಾಗಿ ಅತ್ಯಂತ ಸವಾಲಿನ ವಿಷಯ, ವಿಶೇಷವಾಗಿ ಗೆಡ್ಡೆಯು (ಟ್ಯೂಮರ್) ತುಂಬಾ ದೊಡ್ಡದಾಗಿದ್ದಾಗ. ಶಿಶುವಿನಲ್ಲಿ ರಕ್ತದ ಪ್ರಮಾಣವು ಬಹಳ ಕಡಿಮೆಯಿರುವುದರಿಂದ, ಸ್ವಲ್ಪವೇ ರಕ್ತ ನಷ್ಟವಾದರೂ ಅದು ಗಂಭೀರ ಪರಿಣಾಮಗಳನ್ನು ಬೀರಬಹುದು. ಇಂತಹ ಸಂದರ್ಭಗಳಲ್ಲಿ ಪೋಷಕರಿಗೆ ಸೂಕ್ತ ಮಾಹಿತಿ ನೀಡಿ ಮನವೊಲಿಸುವುದು ಕೂಡ ಒಂದು ದೊಡ್ಡ ಸವಾಲಾಗಿರುತ್ತದೆ. ಅದೃಷ್ಟವಶಾತ್, ಪೋಷಕರು ಸಂಪೂರ್ಣ ಸಹಕಾರ ನೀಡಿದರು ಮತ್ತು ಇದರಲ್ಲಿರುವ ಅಪಾಯಗಳನ್ನು ಅರ್ಥಮಾಡಿಕೊಂಡರು. ನಾವು ಶಸ್ತ್ರಚಿಕಿತ್ಸೆ ನಡೆಸಲು ನಿರ್ಧರಿಸಿದೆವು. ಶಸ್ತ್ರಚಿಕಿತ್ಸೆಯು ಅತ್ಯಂತ ಕ್ಲಿಷ್ಟಕರವಾಗಿತ್ತು, ಆದರೂ ನಾವು ಗೆಡ್ಡೆಯನ್ನು ಸಂಪೂರ್ಣವಾಗಿ ತೆಗೆದುಹಾಕುವಲ್ಲಿ ಯಶಸ್ವಿಯಾದೆವು.”
ಮಾಹೆ ಮಣಿಪಾಲದ ಬೋಧನಾ ಆಸ್ಪತ್ರೆಗಳ ಮುಖ್ಯ ನಿರ್ವಹಣಾಧಿಕಾರಿ ಅಧಿಕಾರಿ ಡಾ. ಸುಧಾಕರ್ ಕಂಟಿಪುಡಿ ಅವರು : “ನಮ್ಮ ಸಂಸ್ಥೆಯು ಏನನ್ನು ಸಾಧಿಸಲು ಸ್ಥಾಪಿತವಾಗಿದೆ ಎಂಬುದನ್ನು ಈ ಪ್ರಕರಣವು ಪ್ರತಿಬಿಂಬಿಸುತ್ತದೆ, ಒಬ್ಬ ರೋಗಿಯ ಸುತ್ತ ಅನೇಕ ವಿಶೇಷ ವಿಭಾಗಗಳನ್ನು ಒಟ್ಟುಗೂಡಿಸುವುದು, ಇಂತಹ ಸಂದರ್ಭಗಳಲ್ಲಿ ಅತ್ಯಂತ ಮುಖ್ಯವಾಗಿದೆ. ದೊಡ್ಡ ಮೆದುಳಿನ ಗೆಡ್ಡೆಯನ್ನು ಹೊಂದಿರುವ ನವಜಾತ ಶಿಶು, ವೈದ್ಯಕೀಯದಲ್ಲಿ ಅತ್ಯಂತ ಸಂಕೀರ್ಣ ಸವಾಲುಗಳಲ್ಲಿ ಒಂದಾಗಿದೆ ಮತ್ತು ಈ ರೀತಿಯ ಫಲಿತಾಂಶವು ನರಶಸ್ತ್ರಚಿಕಿತ್ಸೆ, ನವಜಾತ ಶಿಶುಶಾಸ್ತ್ರ, ಮಕ್ಕಳ ಆಂಕೊಲಾಜಿ, ಕ್ರಿಟಿಕಲ್ ಕೇರ್ ಮತ್ತು ಪುನಶ್ಚೇತನವು ಒಂದೇ ತಂಡವಾಗಿ ಕೆಲಸ ಮಾಡಿದಾಗ ಮಾತ್ರ ಸಾಧ್ಯ, ಹಾಗೂ ಕಸ್ತೂರ್ಬಾ ಆಸ್ಪತ್ರೆಯು ಇಂತಹ ಸವಾಲುಗಳನ್ನು ಎದುರಿಸಲು ಅವಶ್ಯಕ ಮೂಲಸೌಕರ್ಯದಿಂದ ಬೆಂಬಲಿತವಾಗಿದೆ. ನಮ್ಮ ವೈದ್ಯರು ಮತ್ತು ಆರೈಕೆ ಸಿಬ್ಬಂದಿಯ ಬಗ್ಗೆ ನಮಗೆ ತುಂಬಾ ಹೆಮ್ಮೆ ಇದೆ ಮತ್ತು ಈ ಮಗು ಪ್ರಿಸ್ಕೂಲ್ ಅನ್ನು ಪ್ರಾರಂಭಿಸುತ್ತಿದ್ದಂತೆ ಈ ಕುಟುಂಬದ ಸಂತೋಷದಲ್ಲಿ ನಾವೂ ಭಾಗಿಗಳಾಗಿದ್ದೇವೆ ” ಎಂದಿದ್ದಾರೆ.
ಅಪಾಯಕಾರಿ ಸ್ಥಿತಿಯಲ್ಲಿದ್ದ ನವಜಾತ ಶಿಶುವಿನಿಂದ ಹಿಡಿದು, ಈಗ ಪ್ರಿಸ್ಕೂಲ್ಗೆ (ಪೂರ್ವ-ಪ್ರಾಥಮಿಕ ಶಾಲೆಗೆ) ಹೋಗುತ್ತಿರುವ ಸಂತೋಷದ ಮೂರು ವರ್ಷದ ಮಗುವಿನವರೆಗಿನ ಈ ಬಾಲಕನ ಪಯಣವು; ಸಮಯೋಚಿತ ಚಿಕಿತ್ಸೆ, ತಂಡದ ಪ್ರಯತ್ನ ಮತ್ತು ವಿಶೇಷ ಆರೈಕೆ ಏನು ಸಾಧಿಸಬಲ್ಲವು ಎಂಬುದಕ್ಕೆ ಒಂದು ನಿದರ್ಶನವಾಗಿದೆ.
