ನವದೆಹಲಿ, ಫೆ. 26: ಕೇಂದ್ರ ಸರ್ಕಾರವು 2026ರ ಏಪ್ರಿಲ್ 1ರಿಂದ ದೇಶದ ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಶೇಕಡಾ 20 ಎಥೆನಾಲ್ ಮಿಶ್ರಿತ ಪೆಟ್ರೋಲ್ (E20) ಹಾಗೂ ಕನಿಷ್ಠ 95 ರಿಸರ್ಚ್ ಆಕ್ಟೇನ್ ಸಂಖ್ಯೆ (RON) ಹೊಂದಿರುವ ಇಂಧನವನ್ನು ಕಡ್ಡಾಯವಾಗಿ ಮಾರಾಟ ಮಾಡಲು ತೈಲ ಕಂಪನಿಗಳಿಗೆ ನಿರ್ದೇಶನ ನೀಡಿದೆ.
ಪೆಟ್ರೋಲಿಯಂ ಸಚಿವಾಲಯವು ಫೆಬ್ರವರಿ 17ರಂದು ಹೊರಡಿಸಿದ ಅಧಿಸೂಚನೆಯಲ್ಲಿ, ಭಾರತೀಯ ಗುಣಮಟ್ಟದ ಬ್ಯೂರೋ (BIS) ಮಾನದಂಡಗಳಿಗೆ ಅನುಗುಣವಾಗಿ E20 ಮೋಟಾರ್ ಸ್ಪಿರಿಟ್ ಮತ್ತು RON 95ಕ್ಕಿಂತ ಕಡಿಮೆಯಾಗದ ಗುಣಮಟ್ಟದ ಇಂಧನವನ್ನು ದೇಶವ್ಯಾಪಿಯಾಗಿ ಲಭ್ಯವಾಗುವಂತೆ ಮಾಡಲು ಸೂಚಿಸಿದೆ.
ಎಥೆನಾಲ್ ಅನ್ನು ಕಬ್ಬು, ಮೆಕ್ಕೆಜೋಳ ಹಾಗೂ ಇತರೆ ಧಾನ್ಯಗಳಿಂದ ತಯಾರಿಸಲಾಗುತ್ತದೆ. ಇದು ನವೀಕರಿಸಬಹುದಾದ, ದೇಶೀಯ ಮೂಲಗಳಿಂದ ದೊರೆಯುವ ಇಂಧನವಾಗಿದ್ದು, ಸಾಮಾನ್ಯ ಪೆಟ್ರೋಲ್ಗೆ ಹೋಲಿಸಿದರೆ ಶುದ್ಧ ದಹನ ಗುಣ ಹೊಂದಿದೆ. ಇಂಧನ ಆಮದು ವೆಚ್ಚವನ್ನು ಕಡಿಮೆ ಮಾಡುವುದು ಹಾಗೂ ವಾಯುಮಾಲಿನ್ಯ ನಿಯಂತ್ರಿಸುವುದು ಈ ಕ್ರಮದ ಮುಖ್ಯ ಉದ್ದೇಶ ಎಂದು ಸರ್ಕಾರ ತಿಳಿಸಿದೆ. ಜೊತೆಗೆ, ಕೃಷಿ ಉತ್ಪನ್ನಗಳ ಬೇಡಿಕೆ ಹೆಚ್ಚುವುದರಿಂದ ರೈತರಿಗೆ ಆರ್ಥಿಕ ಉತ್ತೇಜನ ದೊರೆಯಲಿದೆ ಎಂದು ನಿರೀಕ್ಷಿಸಲಾಗಿದೆ.
ವಾಹನಗಳಿಗೆ ಪರಿಣಾಮ
2023-25 ಬಳಿಕ ತಯಾರಾದ ಬಹುತೇಕ ವಾಹನಗಳು E20 ಇಂಧನ ಬಳಕೆಗೆ ಹೊಂದಿಕೊಳ್ಳುವಂತೆ ವಿನ್ಯಾಸಗೊಳಿಸಲ್ಪಟ್ಟಿವೆ ಎಂದು ವಾಹನೋದ್ಯಮ ವಲಯದ ಮೂಲಗಳು ಹೇಳಿವೆ. ಆದರೆ ಹಳೆಯ ಮಾದರಿಯ ವಾಹನಗಳಲ್ಲಿ ಶೇ.3ರಿಂದ 7ರವರೆಗೆ ಮೈಲೇಜ್ ಇಳಿಕೆಯಾಗುವ ಸಾಧ್ಯತೆ ಇದೆ. ಕೆಲವೊಂದು ರಬ್ಬರ್ ಮತ್ತು ಪ್ಲಾಸ್ಟಿಕ್ ಭಾಗಗಳ ನಾಶ ಪ್ರಮಾಣವೂ ಹೆಚ್ಚಾಗಬಹುದು ಎಂಬ ಎಚ್ಚರಿಕೆಯೂ ಇದೆ.
RON 95 ಮಹತ್ವ
‘ರಿಸರ್ಚ್ ಆಕ್ಟೇನ್ ಸಂಖ್ಯೆ’ (RON) ಎಂದರೆ ಇಂಧನದ ನಾಕಿಂಗ್ ಪ್ರತಿರೋಧ ಸಾಮರ್ಥ್ಯವನ್ನು ಸೂಚಿಸುವ ಮಾನದಂಡ. ಇಂಜಿನ್ನಲ್ಲಿ ಇಂಧನ ಅಸಮರ್ಪಕವಾಗಿ ದಹಿಸಿದಾಗ ಉಂಟಾಗುವ ‘ನಾಕಿಂಗ್’ ಶಬ್ದ ಹಾಗೂ ದೀರ್ಘಾವಧಿಯಲ್ಲಿ ಇಂಜಿನ್ ಹಾನಿಯನ್ನು ತಪ್ಪಿಸಲು ಹೆಚ್ಚಿನ RON ಅಗತ್ಯವಾಗುತ್ತದೆ. ಎಥೆನಾಲ್ ಸ್ವಭಾವತಃ ಸುಮಾರು 108 RON ಹೊಂದಿರುವುದರಿಂದ, ಪೆಟ್ರೋಲ್ನಲ್ಲಿ ಶೇ.20ರಷ್ಟು ಮಿಶ್ರಣ ಮಾಡುವುದರಿಂದ ಇಂಧನದ ಆಕ್ಟೇನ್ ಮೌಲ್ಯ ಹೆಚ್ಚುತ್ತದೆ.
ಗುರಿ ಮುನ್ನಡೆ
ಭಾರತವು 2022ರ ಜೂನ್ನಲ್ಲಿ ನಿಗದಿತ ಅವಧಿಗಿಂತ ಮುಂಚೆಯೇ ಶೇ.10 ಎಥೆನಾಲ್ ಮಿಶ್ರಣ ಗುರಿ ಸಾಧಿಸಿತ್ತು. ಈ ಹಿನ್ನೆಲೆ, 2030ಕ್ಕೆ ನಿಗದಿಪಡಿಸಿದ್ದ ಶೇ.20 ಮಿಶ್ರಣ ಗುರಿಯನ್ನು 2025-26ರೊಳಗೆ ಸಾಧಿಸುವಂತೆ ಸರ್ಕಾರ ಮುನ್ನಡೆಸಿದೆ. ಈಗಾಗಲೇ ದೇಶದ ಅನೇಕ ಪೆಟ್ರೋಲ್ ಬಂಕ್ಗಳಲ್ಲಿ E20 ಇಂಧನ ಲಭ್ಯವಿದೆ.
