ಬೆಂಗಳೂರು, ಫೆ. 26: ಆಕಸ್ಮಿಕ ಅಪಘಾತ, ಮಾರಣಾಂತಿಕ ಕಾಯಿಲೆ ಅಥವಾ ನೈಸರ್ಗಿಕ ವಿಕೋಪದಿಂದ ಸಂಕಷ್ಟಕ್ಕೀಡಾದ ಬಡ ಮತ್ತು ನಿರ್ಗತಿಕ ಕುಟುಂಬಗಳಿಗೆ ತುರ್ತು ನೆರವು ಒದಗಿಸುವ ಉದ್ದೇಶದಿಂದ ರಾಜ್ಯ ಸರ್ಕಾರವು ‘ಮುಖ್ಯಮಂತ್ರಿಗಳ ಪರಿಹಾರ ನಿಧಿ’ (CMRF) ಯೋಜನೆಯನ್ನು ಜಾರಿಗೆ ತಂದಿದೆ. ಆರ್ಥಿಕವಾಗಿ ಹಿಂದುಳಿದವರಿಗೆ, ವಿಶೇಷವಾಗಿ ತುರ್ತು ಚಿಕಿತ್ಸೆಗೆ ಹಣದ ಕೊರತೆಯಿಂದ ಬಳಲುವವರಿಗೆ ಈ ನಿಧಿ ಮಹತ್ವದ ಆಧಾರವಾಗುತ್ತಿದೆ.
ಯೋಜನೆಯ ಹಿನ್ನೆಲೆ
1958ರಲ್ಲಿ ಸ್ಥಾಪಿತವಾದ ಈ ನಿಧಿ ಮುಖ್ಯಮಂತ್ರಿಗಳ ವಿವೇಚನಾ ಅಧಿಕಾರದಡಿ ಕಾರ್ಯನಿರ್ವಹಿಸುತ್ತದೆ. ಸಾರ್ವಜನಿಕರು, ದಾನಿಗಳು, ಖಾಸಗಿ ಸಂಸ್ಥೆಗಳು ಮತ್ತು ನಿಗಮಗಳಿಂದ ಸ್ವೀಕರಿಸುವ ದೇಣಿಗೆಗಳೇ ಇದರ ಪ್ರಮುಖ ಆಧಾರ. ಈ ನಿಧಿಗೆ ನೀಡುವ ದೇಣಿಗೆಗಳಿಗೆ ಆದಾಯ ತೆರಿಗೆ ಕಾಯ್ದೆಯ 80G ಅಡಿಯಲ್ಲಿ ಶೇ.100ರಷ್ಟು ತೆರಿಗೆ ವಿನಾಯಿತಿ ಲಭ್ಯವಿದೆ. ಪ್ರಕರಣದ ತುರ್ತುಸ್ಥಿತಿ ಹಾಗೂ ಅಗತ್ಯತೆಗೆ ಅನುಗುಣವಾಗಿ ರೂ.5,000ರಿಂದ ರೂ.1 ಲಕ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಪರಿಹಾರ ಮೊತ್ತವನ್ನು ಮಂಜೂರು ಮಾಡಲಾಗುತ್ತದೆ.
ಯಾರು ಸೌಲಭ್ಯಕ್ಕೆ ಅರ್ಹರು?
ಬಿಪಿಎಲ್ (BPL) ಪಡಿತರ ಚೀಟಿ ಹೊಂದಿರುವ ಕಡುಬಡವರು
ಮಾರಣಾಂತಿಕ ಹಾಗೂ ಗಂಭೀರ ಕಾಯಿಲೆಯಿಂದ ಬಳಲುತ್ತಿರುವ ರೋಗಿಗಳು
ಅಪಘಾತದಲ್ಲಿ ಕುಟುಂಬದ ಮುಖ್ಯ ಆರ್ಥಿಕ ಆಧಾರ ಕಳೆದುಕೊಂಡ ನಿರ್ಗತಿಕರು
ನಿರುದ್ಯೋಗಿಗಳು ಹಾಗೂ ದಿವ್ಯಾಂಗರು
ಅರ್ಜಿ ಸಲ್ಲಿಸುವ ವಿಧಾನ
ಪರಿಹಾರಕ್ಕಾಗಿ ಎರಡು ರೀತಿಯಲ್ಲಿ ಅರ್ಜಿ ಸಲ್ಲಿಸಲು ಅವಕಾಶವಿದೆ:
1. ಚಿಕಿತ್ಸೆಗೆ ಮುನ್ನ (ಅಂದಾಜು ವೆಚ್ಚ ಆಧಾರ):
ಚಿಕಿತ್ಸೆ ಇನ್ನೂ ಆರಂಭವಾಗದಿದ್ದಲ್ಲಿ, ಸಂಬಂಧಿತ ಆಸ್ಪತ್ರೆಯಿಂದ ಪಡೆದ ಚಿಕಿತ್ಸಾ ವೆಚ್ಚದ ಅಂದಾಜು ಪಟ್ಟಿ (Estimate Bill) ಅಗತ್ಯ. ಈ ಪಟ್ಟಿ 40 ದಿನಗಳೊಳಗಿನದ್ದಾಗಿರಬೇಕು. ಅರ್ಜಿದಾರರು ಚಿಕಿತ್ಸೆಗೂ ಮುನ್ನ ಜೀವಂತವಾಗಿರಬೇಕು ಹಾಗೂ ಇದೇ ನಿಧಿಯಿಂದ ಪೂರ್ವದಲ್ಲಿ ನೆರವು ಪಡೆದಿರಬಾರದು.
2. ಚಿಕಿತ್ಸೆಯ ನಂತರ:
ಚಿಕಿತ್ಸೆ ಪೂರ್ಣಗೊಂಡ ಬಳಿಕ ಅರ್ಜಿ ಸಲ್ಲಿಸುವವರು ಆಸ್ಪತ್ರೆಯ ಅಂತಿಮ ಬಿಲ್, ಡಿಸ್ಚಾರ್ಜ್ ಸಮ್ಮರಿ ಮತ್ತು ಸಂಬಂಧಿತ ವೈದ್ಯರ ಸಹಿ-ಮೊಹರು ಹೊಂದಿದ ದಾಖಲೆಗಳನ್ನು ಸಲ್ಲಿಸಬೇಕು. ಚಿಕಿತ್ಸೆ ಪಡೆದ ದಿನಾಂಕದಿಂದ ಒಂದು ವರ್ಷದೊಳಗೆ ಅರ್ಜಿ ಸಲ್ಲಿಸುವುದು ಕಡ್ಡಾಯ. ಖಾಸಗಿ ಮೆಡಿಕಲ್ ಅಂಗಡಿಗಳ ಬಿಲ್ಲುಗಳನ್ನು ಪರಿಗಣಿಸಲಾಗುವುದಿಲ್ಲ.
ಅಗತ್ಯ ದಾಖಲೆಗಳು
ಆಧಾರ್ ಕಾರ್ಡ್ (ಬ್ಯಾಂಕ್ ಖಾತೆಗೆ ಜೋಡಣೆ ಅಗತ್ಯ)
ಬಿಪಿಎಲ್ ಪಡಿತರ ಚೀಟಿ
ಆಸ್ಪತ್ರೆಯ ಅಂದಾಜು ಪಟ್ಟಿ ಅಥವಾ ಅಂತಿಮ ಬಿಲ್ ಹಾಗೂ ಡಿಸ್ಚಾರ್ಜ್ ಸಮ್ಮರಿ
ಪಾಸ್ಪೋರ್ಟ್ ಅಳತೆಯ ಭಾವಚಿತ್ರ
ಆಧಾರ್ ಜೋಡಣೆಗೊಂಡ ಬ್ಯಾಂಕ್ ಪಾಸ್ಬುಕ್ ಪ್ರತಿ
ಅಗತ್ಯವಿದ್ದಲ್ಲಿ ಮರಣ ಪ್ರಮಾಣ ಪತ್ರ
ಶಾಸಕರ/ಸಚಿವರ ಶಿಫಾರಸ್ಸು ಪತ್ರ (ಲಭ್ಯವಿದ್ದಲ್ಲಿ)
ಆನ್ಲೈನ್ ವ್ಯವಸ್ಥೆ
ಪ್ರಕ್ರಿಯೆಯನ್ನು ಪಾರದರ್ಶಕಗೊಳಿಸಲು ಅರ್ಜಿಗಳನ್ನು ಈಗ ಆನ್ಲೈನ್ ವ್ಯವಸ್ಥೆಯ ಮೂಲಕ ಸ್ವೀಕರಿಸಲಾಗುತ್ತಿದೆ. ಅರ್ಜಿದಾರರು ತಮ್ಮ ಅರ್ಜಿಯ ಸ್ಥಿತಿಯನ್ನು ಮೊಬೈಲ್ ಮೂಲಕವೇ ಪರಿಶೀಲಿಸಬಹುದು. ಹೆಚ್ಚಿನ ವಿವರಗಳಿಗೆ ಅಧಿಕೃತ ಜಾಲತಾಣ cmrf.karnataka.gov.in ವೀಕ್ಷಿಸಬಹುದು.
ಸಂಕಷ್ಟದ ಕ್ಷಣದಲ್ಲಿ ಆರ್ಥಿಕ ನೆರವು ಅಗತ್ಯವಿರುವ ಕುಟುಂಬಗಳಿಗೆ ‘ಮುಖ್ಯಮಂತ್ರಿಗಳ ಪರಿಹಾರ ನಿಧಿ’ ಪರಿಣಾಮಕಾರಿ ಆಸರೆಯಾಗಿದ್ದು, ಅರ್ಹರು ಈ ಸೌಲಭ್ಯವನ್ನು ಬಳಸಿಕೊಳ್ಳಬಹುದು.
