ಮಣಿಪಾಲ, ನವೆಂಬರ್ 5, 2026: ಲೇಖಕಿ ಮೇಧಾ ಭಟ್ ಅವರ ‘ಬ್ಯಾಲಡ್ಸ್ ಆಫ್ ಜಂಬೂದ್ವೀಪ’ ಕೃತಿಯ ಅನಾವರಣವು ಮಣಿಪಾಲ್ ಅಕಾಡೆಮಿ ಆಫ್ ಹೈಯರ್ ಎಜುಕೇಶನ್ (ಮಾಹೆ) ವಿಶ್ವವಿದ್ಯಾಲಯ ಎಂದು ಪರಿಗಣಿತವಾಗಿರುವ ಉತ್ಕೃಷ್ಟ ಸಂಸ್ಥೆಯ ಪ್ರಧಾನ ಕಚೇರಿಯಲ್ಲಿರುವ ಎಡ್ಮಿಶನ್‌ ಹಾಲ್‌ನಲ್ಲಿ ಇಂದು [ನವೆಂಬರ್ 6, 2026ರಂದು] ನಡೆಯಲಿದೆ. ಮಾಹೆ ಟ್ರಸ್ಟ್‌ನ ಟ್ರಸ್ಟಿಯಾಗಿರುವ ಶ್ರೀಮತಿ ವಸಂತಿ ಆರ್‌. ಪೈ ಅವರು ಈ ಕೃತಿಯನ್ನು ಬಿಡುಗಡೆಗೊಳಿಸಲಿದ್ದು, ಮಾಹೆಯ ಕುಲಪತಿ ಡಾ. ಶರತ್‌ ಕೆ. ರಾವ್‌ ಅವರು ಅಧ್ಯಕ್ಷತೆ ವಹಿಸಲಿದ್ದಾರೆ.
‘ಬ್ಯಾಲಡ್ಸ್ ಆಫ್ ಜಂಬೂದ್ವೀಪ’ ಕೃತಿಯು ಭಾರತೀಯ ಶ್ರೀಮಂತ ಕಥನಪರಂಪರೆಯ ಕಾಲಾತೀತ ಮೌಲ್ಯದ ಕತೆಗಳನ್ನು ಕಾವ್ಯಾತ್ಮಕವಾಗಿ ಮರುನಿರೂಪಿಸುವ ಪ್ರಯತ್ನವಾಗಿದೆ. ‘ಜಂಬೂದ್ವೀಪ’ ಎಂದು ಖ್ಯಾತವಾಗಿದ್ದ ಭಾರತದ ಭೌಗೋಳಿಕ ಆವರಣದ ಪರಂಪರೆಯಲ್ಲಿ ತಲೆಮಾರಿನಿಂದ ತಲೆಮಾರಿಗೆ ಹರಿದು ಬಂದಿರುವ ಸಾರ್ವತ್ರಿಕ ಸತ್ಯಗಳನ್ನು ಇಲ್ಲಿನ ಪ್ರತೀ ಕವಿತೆಯೂ ಪ್ರತಿಧ್ವನಿಸುತ್ತದೆ. ಮಂತ್ರಗಳಿಂದ ಗೀತೆಗಳವರೆಗೆ, ಸುಗ್ಗಿಹಾಡುಗಳಿಂದ ಚರಮಗೀತೆಗಳವರೆಗೆ ಅಗಾಧ ಹರಹನ್ನು ಒಳಗೊಂಡಿರುವ ಕಥನ-ಕಾವ್ಯ ಪರಂಪರೆಯನ್ನು ಕವಿತೆಗಳಲ್ಲಿ ಹಿಡಿದಿಡುವ ಪ್ರಯತ್ನ ಈ ಕೃತಿಯಲ್ಲಿದೆ. ಲೇಖಕಿಯ ಸ್ವಗತ ನುಡಿ ಮತ್ತು ಕಲಾತ್ಮಕ ಚಿತ್ರಗಳು ಕೃತಿಯ ಮೌಲ್ಯವನ್ನು ಹೆಚ್ಚಿಸಿವೆ. ಅಮೆರಿಕದ ಟೆಕ್ಸಾಸ್‌ನಲ್ಲಿ ಇಂಜಿನಿಯರ್‌ ಮತ್ತು ಔದ್ಯಮಿಕ ವಿಶ್ಲೇಷಕಿಯಾಗಿರುವ ಮೇಧಾ ಭಟ್ ಅವರ ಸಾಹಿತ್ಯಜ್ಞಾನ ಮತ್ತು ಕಾವ್ಯಾಸಕ್ತಿ ಈ ಕೃತಿಯಲ್ಲಿ ಪ್ರತಿಬಿಂಬಿತವಾಗಿದೆ.
