ಉಡುಪಿ, ಸೆ. 26: ಮನೋರೋಗಕ್ಕೆ ಒಳಗಾಗಿ ಬೀದಿಬದಿಯಲ್ಲಿ ಅಲೆದಾಡುತ್ತಿದ್ದ ಗದಗ ಜಿಲ್ಲೆಯ ವ್ಯಕ್ತಿಯೊಬ್ಬರನ್ನು ಸಮಾಜಸೇವಕ ನಿತ್ಯಾನಂದ ಒಳಕಾಡು ಅವರು ರಕ್ಷಿಸಿ, ಕೆಲವು ತಿಂಗಳುಗಳ ಹಿಂದೆ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿದ್ದರು.
ಜಿಲ್ಲಾ ಆಸ್ಪತ್ರೆಯ ಮನೋರೋಗ ವಿಭಾಗದಲ್ಲಿರುವ ECRC ವಿಭಾಗದಲ್ಲಿ ಮನೋರೋಗ ವಿಭಾಗದ ಮುಖ್ಯಸ್ಥರು ಹಾಗೂ ನಿವಾಸಿ ವೈದ್ಯಾಧಿಕಾರಿ ಡಾ. ವಾಸುದೇವ್, ಮನೋವೈದ್ಯ ಡಾ. ಸುನಿಲ್ ಹಾಗೂ ಸ್ನಾತಕೋತ್ತರ ವೈದ್ಯೆ ಡಾ. ಶೀನಾ ಅವರನ್ನು ಒಳಗೊಂಡ ವೈದ್ಯಕೀಯ ತಂಡವು ನಿರಂತರ ಚಿಕಿತ್ಸೆ ನೀಡಿತು. ಸರಕಾರದ ಯೋಜನೆಯಡಿ ಕಾರ್ಯನಿರ್ವಹಿಸುತ್ತಿರುವ ECRC ವಿಭಾಗದ ತಂಡವೂ ರೋಗಿಯ ಆರೈಕೆ ಹಾಗೂ ಪುನರ್ವಸತಿಗೆ ಅಗತ್ಯವಾದ ಪ್ರಯತ್ನಗಳನ್ನು ನಡೆಸಿತು. ಪರಿಣಾಮವಾಗಿ ರೋಗಿಯ ಆರೋಗ್ಯದಲ್ಲಿ ಗಮನಾರ್ಹ ಸುಧಾರಣೆ ಕಂಡುಬಂದು, ಅವರು ಗುಣಮುಖರಾದರು.
ಇದೇ ವೇಳೆ, ECRC ವಿಭಾಗದ ಪ್ರಬಂಧಕರಾದ ಸುರೇಶ್ ಎಸ್. ನಾವೂರು ಅವರು ಸತತ ಪ್ರಯತ್ನ ನಡೆಸಿ ರೋಗಿಯ ಕುಟುಂಬವನ್ನು ಪತ್ತೆಹಚ್ಚುವಲ್ಲಿ ಯಶಸ್ವಿಯಾದರು. ಹಲವು ವರ್ಷಗಳ ಬಳಿಕ ತನ್ನ ಕುಟುಂಬದ ಸದಸ್ಯರನ್ನು ಭೇಟಿಯಾದ ರೋಗಿಯು ಕೊನೆಗೂ ಕುಟುಂಬದ ಮಡಿಲಿಗೆ ಮರಳುವಂತಾಯಿತು.
ಜಿಲ್ಲಾ ಆಸ್ಪತ್ರೆಗೆ ಆಗಮಿಸಿದ ರೋಗಿಯ ತಾಯಿ, ಅಕ್ಕ ಹಾಗೂ ಅಕ್ಕನ ಮಗ ಅವರನ್ನು ತಮ್ಮೊಂದಿಗೆ ಕರೆದುಕೊಂಡು ಹೋಗುವ ಸಂದರ್ಭದಲ್ಲಿ ಕುಟುಂಬದ ಸದಸ್ಯರು ಅಪಾರ ಸಂತೋಷ ವ್ಯಕ್ತಪಡಿಸಿದರು. ಹಲವು ವರ್ಷಗಳ ಬಳಿಕ ತಮ್ಮ ಕುಟುಂಬದ ಸದಸ್ಯನನ್ನು ಮರಳಿ ಪಡೆದ ಸಂತಸದ ಕ್ಷಣ ಎಲ್ಲರಲ್ಲೂ ಭಾವುಕತೆ ಮೂಡಿಸಿತು.
