ಮಣಿಪಾಲ, ಸೆಪ್ಟೆಂಬರ್ 10, 2026: ಮಣಿಪಾಲ್ ಅಕಾಡೆಮಿ ಆಫ್ ಹೈಯರ್ ಎಜುಕೇಶನ್ (ಮಾಹೆ) ವಿಶ್ವವಿದ್ಯಾಲಯ ಎಂದು ಪರಿಗಣಿತವಾಗಿರುವ ಉತ್ಕೃಷ್ಟ ಸಂಸ್ಥೆಯು ಆಸ್ಟ್ರೇಲಿಯಾದ ಪೂರ್ವ ಕರಾವಳಿಯ ನ್ಯೂ ಸೌತ್ ವೇಲ್ಸ್ (ಎನ್ಎಸ್ಡಬ್ಲ್ಯು)ನ ವಿಶ್ವವಿದ್ಯಾಲಯಗಳ ಜೊತೆಗೆ ಶೈಕ್ಷಣಿಕ ಹಾಗೂ ಸಂಶೋಧನಾ ಸಹಭಾಗಿತ್ವದ ಒಪ್ಪಂದಕ್ಕೆ ಸಹಿ ಹಾಕಿದೆ. ನ್ಯೂ ಸೌತ್ ವೇಲ್ಸ್ನ ಪ್ರಮುಖ ಐದು ವಿಶ್ವವಿದ್ಯಾಲಯಗಳಾದ ದಿ ಯೂನಿವರ್ಸಿಟಿ ಆಫ್ ಸಿಡ್ನಿ, ಯುಎನ್ಎಸ್ಡಬ್ಲ್ಯು ಸಿಡ್ನಿ, ಮ್ಯಾಕ್ವಾರಿ ವಿಶ್ವವಿದ್ಯಾನಿಲಯ, ದಿ ಯೂನಿವರ್ಸಿಟಿ ಆಫ್ ಟೆಕ್ನಾಲಜಿ ಸಿಡ್ನಿ ಮತ್ತು ವೆಸ್ಟರ್ನ್ ಸಿಡ್ನಿ ವಿಶ್ವವಿದ್ಯಾನಿಲಯಗಳೊಂದಿಗೆ ಮಾಹೆಯ ಈ ಸಹಯೋಗವು ಶೈಕ್ಷಣಿಕ ಮತ್ತು ಸಂಶೋಧನ ಚಟುವಟಿಕೆಗಳ ಜೊತೆಗೆ ವಿದ್ಯಾರ್ಥಿಗಳು, ಪ್ರಾಧ್ಯಾಪಕರು ಮತ್ತು ಸಂಶೋಧಕರ ವಿನಿಮಯವನ್ನು ಒಳಗೊಂಡಿವೆ.
ನ್ಯೂ ಸೌತ್ ವೇಲ್ಸ್ (ಎಸ್ಎಸ್ಡಬ್ಲ್ಯು) ಸರ್ಕಾರದ ನಿಯೋಗವು ಆಗಸ್ಟ್ 31 ರಿಂದ ಸೆಪ್ಟೆಂಬರ್ 3, 2026ರವರೆಗೆ ಭಾರತ ಸಂದರ್ಶನದಲ್ಲಿದ್ದು ಆರ್ಥಿಕ, ಶಿಕ್ಷಣ, ಸಂಶೋಧನೆ, ನವೋದ್ಯಮ ಮತ್ತು ಸಂಸ್ಕೃತಿ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಎನ್ಎಸ್ಡಬ್ಲ್ಯು ಮತ್ತು ಭಾರತದ ನಡುವಿನ ಬಾಂಧವ್ಯವನ್ನು ಸದೃಢಗೊಳಿಸುವ ನಿಟ್ಟಿನಲ್ಲಿ ಕ್ರಿಯಾಶೀಲ ಪ್ರಯತ್ನ ನಡೆಸಿತು. ಅಲ್ಲದೆ, ಎರಡೂ ಕಡೆಯ ಆಡಳಿತ ವ್ಯವಸ್ಥೆ, ಶೈಕ್ಷಣಿಕ ಸಂಸ್ಥೆಗಳು, ಕೈಗಾರಿಕೆಗಳು ಮತ್ತು ಸಮುದಾಯಗಳ ನಡುವೆ ದೀರ್ಘಕಾಲೀನ ಪಾಲುದಾರಿಕೆಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುವಲ್ಲಿ ಯಶಸ್ವಿಯಾಯಿತು.
ಕ್ರಿಸ್ ಮಿನ್ಸ್ ಎಂಪಿ, ಆಡಳಿತ ಮುಖ್ಯಸ್ಥರು, ಎನ್ಎಸ್ಡಬ್ಲ್ಯು ಹಾಗೂ ಡೇನಿಯಲ್ ಮೂಕ್ಹಿ ಎಂಎಲ್ಸಿ, ವಿತ್ತಪ್ರಮುಖರು, ಎನ್ಎಸ್ಡಬ್ಲ್ಯು ಅವರ ನೇತೃತ್ವದಲ್ಲಿ ನಡೆದ ಈ ಪ್ರವಾಸದಲ್ಲಿ ನ್ಯೂ ಸೌತ್ ವೇಲ್ಸ್ ಮತ್ತು ಭಾರತದ ಹಿರಿಯ ಸರ್ಕಾರಿ ಅಧಿಕಾರಿಗಳು, ನೀತಿ ನಿರೂಪಕರು, ಶಿಕ್ಷಣ ತಜ್ಞರು, ಕೈಗಾರಿಕಾ ವಲಯದ ನಾಯಕರು ಹಾಗೂ ಇತರ ಪ್ರಮುಖ ಪ್ರತಿನಿಧಿಗಳು ಭಾಗವಹಿಸಿದ್ದರು. ದ್ವಿಪಕ್ಷೀಯ ಸಹಕಾರವನ್ನು ಮತ್ತಷ್ಟು ಬಲಪಡಿಸುವ ಅವಕಾಶಗಳನ್ನು ಕಂಡುಕೊಳ್ಳುವುದು ಇದರ ಪ್ರಮುಖ ಉದ್ದೇಶವಾಗಿತ್ತು.
ಈ ಪ್ರವಾಸದ ಅಂಗವಾಗಿ, ಎನ್ಎಸ್ಡಬ್ಲ್ಯು ಸರ್ಕಾರವು ಮುಂಬೈನಲ್ಲಿ ಏರ್ಪಡಿಸಿದ್ದ ವಿಶೇಷ ಸಮಾರಂಭದಲ್ಲಿ ಎರಡೂ ಕಡೆಗಳ ಸಮಾನ ಕ್ಷೇತ್ರಗಳಲ್ಲಿ ಹೆಚ್ಚಿನ ಸಹಕಾರವನ್ನು ವಿಸ್ತರಿಸುವಲ್ಲಿ ಸಂವಾದ ನಡೆಸಲು ಮತ್ತು ಹೊಸ ಅವಕಾಶದ ಕ್ಷೇತ್ರಗಳನ್ನು ಗುರುತಿಸಲು ಈ ಸಮಾರಂಭ ಪ್ರಮುಖ ವೇದಿಕೆಯಾಯಿತು.
ಮಾಹೆ ಮತ್ತು ದಿ ಯೂನಿವರ್ಸಿಟಿ ಆಫ್ ಸಿಡ್ನಿ (ಯುಸ್ವೈಡಿ) ನಡುವೆ ಶಿಕ್ಷಣ, ಸಂಶೋಧನೆ, ನವೋದ್ಯಮ ಮತ್ತು ಅಂತಾರಾಷ್ಟ್ರೀಯ ಶೈಕ್ಷಣಿಕ ವಿನಿಮಯ ಕ್ಷೇತ್ರಗಳಲ್ಲಿ ಸಹಕಾರವನ್ನು ಬಲಪಡಿಸುವ ಆಶಯದಲ್ಲಿ ಪರಸ್ಪರ ಒಡಂಬಡಿಕೆ [ಎಂಒಯು] ಗೆ ಸೆಪ್ಟೆಂಬರ್ 2 ರಂದು ಎರಡೂ ಸಂಸ್ಥೆಗಳ ಪ್ರತಿನಿಧಿಗಳು ಸಹಿ ಹಾಕಿದರು.
ಮಾಹೆ ಮತ್ತು ಎನ್ಎಸ್ಡಬ್ಲ್ಯು ವಿಶ್ವವಿದ್ಯಾನಿಲಯಗಳ ನಡುವೆ ಶೈಕ್ಷಣಿಕ ಮತ್ತು ಸಂಶೋಧನಾತ್ಮಕ ಕ್ಷೇತ್ರಗಳಿಗೆ ಸಂಬಂಧಿಸಿ ನಡೆದ ಒಪ್ಪಂದ ಕುರಿತು ಹರ್ಷ ವ್ಯಕ್ತಪಡಿಸಿದ ಮಾಹೆಯ ಕುಲಪತಿ ಡಾ. ಶರತ್ ರಾವ್ ಅವರು, ‘‘ಎನ್ಎಸ್ಡಬ್ಲ್ಯು ಸರ್ಕಾರಿ ನಿಯೋಗದ ಭಾರತ ಪ್ರವಾಸವು ನ್ಯೂ ಸೌತ್ ವೇಲ್ಸ್ ಮತ್ತು ಭಾರತದ ನಡುವಿನ ದೀರ್ಘಕಾಲೀನ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸಲು ಕಾರಣವಾಗಿದೆ. ಆಸ್ಟ್ರೇಲಿಯಾದ ಉನ್ನತ ಶಿಕ್ಷಣ ಸಂಸ್ಥೆಗಳು ಮತ್ತು ಮಾಹೆಯ ನಡುವೆ ನಿಕಟ ಸಂಬಂಧ ಬಹುಕಾಲದಿಂದಲೂ ಇದೆ. ಪ್ರಸ್ತುತ ಈಗ ಆಸ್ಟ್ರೇಲಿಯಾದ ಪೂರ್ವ ಕರಾವಳಿಯ ನ್ಯೂ ಸೌತ್ ವೇಲ್ಸ್ [ಎನ್ಎಸ್ಡಬ್ಲ್ಯು] ಜೊತೆಗೆ ಗಾಢವಾದ ಮತ್ತು ಸುಸ್ಥಿರವಾದ ಸಂಬಂಧವನ್ನು ಬೆಸೆಯಲು ಈ ಒಡಂಬಡಿಕೆಯ ಮೂಲಕ ಅವಕಾಶ ಒದಗಿದೆ. ಮಾಹೆ ಯಾವತ್ತೂ ವಿಶ್ವದ ಯಾವುದೇ ನವಜ್ಞಾನಪರಂಪರೆಗೆ ತನ್ನನ್ನು ತಾನು ತೆರೆದುಕೊಳ್ಳುವಲ್ಲಿ ಮತ್ತು ತನ್ನಲ್ಲಿರುವ ಜ್ಞಾನವನ್ನು ವಿಶ್ವದೊಂದಿಗೆ ಹಂಚಿಕೊಳ್ಳುವಲ್ಲಿ ಸದಾ ಮುಕ್ತವಾಗಿದೆ. ನ್ಯೂಸೌತ್ವೇಲ್ಸ್ನ ಉನ್ನತ ಶಿಕ್ಷಣ ಸಂಸ್ಥೆಗಳು ಮತ್ತು ಮಾಹೆಯ ನಡುವೆ ವಿದ್ಯಾರ್ಥಿಗಳು, ಬೋಧಕವರ್ಗ ಮತ್ತು ಸಂಶೋಧಕರ ಸಹಯೋಗ ಮತ್ತು ಪ್ರವಾಸದ ಮೂಲಕ ಜ್ಞಾನವಿನಿಮಯದ ಅರ್ಥಪೂರ್ಣ ಅವಕಾಶಗಳನ್ನು ಸೃಷ್ಟಿಸಲು ಮಾಹೆ ಬದ್ಧವಾಗಿದೆ”ಎಂದರು.
