ಮಣಿಪಾಲ, ಸೆಪ್ಟೆಂಬರ್ 3: ಬಾಲ್ಯ ಕ್ಯಾನ್ಸರ್ ಜಾಗೃತಿ ಮಾಸವನ್ನು ಆಚರಿಸುವ ಅಂಗವಾಗಿ, ಕಸ್ತೂರ್ಬಾ ವೈದ್ಯಕೀಯ ಮಹಾವಿದ್ಯಾಲಯ ಮತ್ತು ಆಸ್ಪತ್ರೆ, ಮಣಿಪಾಲದ ಮಕ್ಕಳ ಕ್ಯಾನ್ಸರ್ ವಿಭಾಗವು ‘ವಿಂಗ್ಸ್ ಆಫ್ ಹೋಪ್’ ಎಂಬ ವಿಶೇಷ ಕಾರ್ಯಕ್ರಮವನ್ನು ಆಯೋಜಿಸಿತು. ಈ ಕಾರ್ಯಕ್ರಮವು ಮಂಗಳವಾರದಂದು ಮಣಿಪಾಲದ ಹಾವಂಜೆಯಲ್ಲಿರುವ ಮಣಿಪಾಲ ಹಾಸ್ಪೈಸ್ ಆ್ಯಂಡ್ ರೆಸ್ಪೈಟ್ ಸೆಂಟರ್ (MHRC)ನ ಸಭಾಂಗಣದಲ್ಲಿ ನಡೆಯಿತು.
‘ಭರವಸೆ, ಶಕ್ತಿ ಮತ್ತು ನಗು’ ಎಂಬ ಸಂದೇಶದೊಂದಿಗೆ ರೂಪುಗೊಂಡ ಈ ಕಾರ್ಯಕ್ರಮದಲ್ಲಿ ಸುಮಾರು 65 ಬಾಲ್ಯ ಕ್ಯಾನ್ಸರ್ನಿಂದ ಗುಣಮುಖರಾದ ಮಕ್ಕಳು ಹಾಗೂ ಅವರ ಪೋಷಕರು ಭಾಗವಹಿಸಿದ್ದರು. ಬಾಲ್ಯ ಕ್ಯಾನ್ಸರ್ ಜಾಗೃತಿಯ ಸಂಕೇತವಾದ ಚಿನ್ನದ ರಿಬ್ಬನ್ ಈ ಸಂದರ್ಭಕ್ಕೆ ವಿಶೇಷ ಮೆರುಗು ನೀಡಿತು; ರೋಗವನ್ನು ಎದುರಿಸಿ ಗೆದ್ದ ಈ ಪುಟ್ಟ ಧೀರ ಮಕ್ಕಳನ್ನು ಗೌರವಿಸಲಾಯಿತು.
ಖ್ಯಾತ ರಂಗಭೂಮಿ ಹಾಗೂ ಚಲನಚಿತ್ರ ನಟಿ, ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಪುರಸ್ಕೃತೆ ರೂಪಶ್ರೀ ವರ್ಕಾಡಿ ಅವರು ಮುಖ್ಯ ಅತಿಥಿಯಾಗಿ ಭಾಗವಹಿಸಿ, ಕಾರ್ಯಕ್ರಮದಲ್ಲಿ ಸನ್ಮಾನಿಸಲ್ಪಟ್ಟರು. ಗುಣಮುಖರಾದ ಮಕ್ಕಳು ಮತ್ತು ಅವರ ಕುಟುಂಬಗಳೊಂದಿಗೆ ಆತ್ಮೀಯವಾಗಿ ಬೆರೆತ ಅವರು, ಕ್ಯಾನ್ಸರ್ ವಿರುದ್ಧ ಹೋರಾಡುತ್ತಿರುವ ಮಕ್ಕಳ ಆರೈಕೆಯಲ್ಲಿ ಕಸ್ತೂರ್ಬಾ ಆಸ್ಪತ್ರೆ ಮಾಡುತ್ತಿರುವ ಶ್ಲಾಘನೀಯ ಕಾರ್ಯವನ್ನು ಪ್ರಶಂಸಿಸಿದರು.
“ಕಸ್ತೂರ್ಬಾ ಆಸ್ಪತ್ರೆಯ ವೈದ್ಯರು ಮತ್ತು ಸಿಬ್ಬಂದಿ ಈ ಪುಟ್ಟ ಕ್ಯಾನ್ಸರ್ ರೋಗಿಗಳ ಚಿಕಿತ್ಸೆ ಮತ್ತು ಆರೈಕೆಯಲ್ಲಿ ನಿಜಕ್ಕೂ ಶ್ಲಾಘನೀಯ ಕೆಲಸ ಮಾಡುತ್ತಿದ್ದಾರೆ. ಎಲ್ಲ ಪೋಷಕರು ಮತ್ತು ಮಕ್ಕಳು ವೈದ್ಯರ ಮೇಲೆ ವಿಶ್ವಾಸವಿಟ್ಟು ಅವರೊಂದಿಗೆ ಕೈಜೋಡಿಸಿ ಕೆಲಸ ಮಾಡಬೇಕೆಂದು ನಾನು ವಿನಂತಿಸುತ್ತೇನೆ. ಜೊತೆಗೆ, ಗುಣಮುಖರಾದ ಕುಟುಂಬಗಳು ಇನ್ನೂ ಚಿಕಿತ್ಸೆ ಪಡೆಯುತ್ತಿರುವ ಮಕ್ಕಳ ಬಳಿಗೆ ಹೋಗಿ, ಅವರೊಂದಿಗೆ ಸಮಯ ಕಳೆದು ತಮ್ಮ ಅನುಭವಗಳನ್ನು ಹಂಚಿಕೊಳ್ಳಬೇಕು — ಏಕೆಂದರೆ, ಅದೇ ಹಾದಿಯಲ್ಲಿ ನಡೆದು ಗೆದ್ದ ಇನ್ನೊಬ್ಬರನ್ನು ಭೇಟಿಯಾಗುವುದಕ್ಕಿಂತ ದೊಡ್ಡ ಶಕ್ತಿ ಕ್ಯಾನ್ಸರ್ ವಿರುದ್ಧ ಹೋರಾಡುವ ಮಗುವಿಗೆ ಬೇರೊಂದಿಲ್ಲ” ಎಂದು ವರ್ಕಾಡಿ ಹೇಳಿದರು.
ಎಲ್ಲ ಗುಣಮುಖರಾದವರ ಪರವಾಗಿ ಮಾತನಾಡಿದ, ಗುಣಮುಖರಾದ ಕುಮಾರಿ ಐಶ್ವರ್ಯ ಹಾಗೂ ಗುಣಮುಖ ಮಗುವಿನ ತಾಯಿ ಶ್ರೀಮತಿ ಶ್ವೇತಾ, “ಮಕ್ಕಳ ಕ್ಯಾನ್ಸರ್ ವಿಭಾಗ ಮತ್ತು ಕಸ್ತೂರ್ಬಾ ಆಸ್ಪತ್ರೆ, ಮಣಿಪಾಲದ ಇಡೀ ತಂಡಕ್ಕೆ ಕೃತಜ್ಞತೆ ಸಲ್ಲಿಸಲು ನಮ್ಮ ಬಳಿ ಪದಗಳೇ ಸಾಲದು. ನಮ್ಮ ಜೀವನದ ಅತ್ಯಂತ ಕಷ್ಟದ ದಿನಗಳಲ್ಲಿ ವೈದ್ಯರು, ದಾದಿಯರು ಮತ್ತು ಆರೈಕೆದಾರರು ನಮ್ಮ ಕುಟುಂಬದಂತೆ ನಮ್ಮೊಂದಿಗೆ ನಿಂತರು; ಅವರ ಅವಿಶ್ರಾಂತ ಆರೈಕೆ ಮತ್ತು ಕರುಣೆಯಿಂದಾಗಿಯೇ ಇಂದು ನಮ್ಮ ಮಕ್ಕಳು ನಗುತ್ತಿದ್ದಾರೆ” ಎಂದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಮಾಹೆ, ಮಣಿಪಾಲದ ಬೋಧನಾ ಆಸ್ಪತ್ರೆಗಳ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (COO) ಡಾ. ಸುಧಾಕರ್ ಕಂಟಿಪುಡಿ ವಹಿಸಿದ್ದರು. “ನಮ್ಮ ಬಳಿ ಬಂದು ಗುಣಮುಖರಾಗಿ ಹೊರಬರುವ ಪ್ರತಿ ಮಗುವೂ ಅಸಾಧಾರಣ ಧೈರ್ಯದ ಕಥೆ ಮಗುವಿನ ಧೈರ್ಯ, ಕುಟುಂಬದ ಸಮರ್ಪಣೆ ಮತ್ತು ನಮ್ಮ ವೈದ್ಯಕೀಯ ತಂಡಗಳ ಅವಿಶ್ರಾಂತ ಬದ್ಧತೆ. ‘ವಿಂಗ್ಸ್ ಆಫ್ ಹೋಪ್’ ಎಂಬುದು ಈ ಪುಟ್ಟ ವೀರರನ್ನು ಸಂಭ್ರಮಿಸುವ ಮತ್ತು ಪ್ರತಿ ಕುಟುಂಬಕ್ಕೂ ‘ನೀವು ಈ ಪಯಣದಲ್ಲಿ ಒಂಟಿಯಲ್ಲ’ ಎಂಬುದನ್ನು ನೆನಪಿಸುವ ನಮ್ಮ ಪ್ರಯತ್ನ. ಮಾಹೆ ಮತ್ತು ನಮ್ಮ ಟೀಚಿಂಗ್ ಹಾಸ್ಪಿಟಲ್ಸ್ ಮಕ್ಕಳ ಕ್ಯಾನ್ಸರ್ ಆರೈಕೆಗೆ ಕರುಣಾಪೂರ್ಣ ಹಾಗೂ ವಿಶ್ವದರ್ಜೆಯ ಸೇವೆ ನೀಡಲು ಸದಾ ಬದ್ಧವಾಗಿದೆ” ಎಂದು ಡಾ. ಕಂಟಿಪುಡಿ ಹೇಳಿದರು.
ಕಾರ್ಯಕ್ರಮದಲ್ಲಿ ವಿವಿಧ ವಯೋಮಾನದ ಮಕ್ಕಳಿಗಾಗಿ ವಿಶೇಷ ಚಟುವಟಿಕೆಗಳನ್ನು ಆಯೋಜಿಸಲಾಗಿತ್ತು. 12 ವರ್ಷದೊಳಗಿನ ಮಕ್ಕಳು ಕಥೆ ಹೇಳುವ ಗೋಷ್ಠಿಯಲ್ಲಿ ಪಾಲ್ಗೊಂಡು, ನಂತರ ಶಾಂತಿ, ಗುಣಪಡಿಸುವಿಕೆ ಮತ್ತು ಭರವಸೆಯ ಸಂಕೇತವಾದ ‘ಪೀಸ್ ಕ್ರೇನ್’ಗಳನ್ನು ಮಡಚುವ ಒರಿಗಾಮಿ ಚಟುವಟಿಕೆಯನ್ನು ಆನಂದಿಸಿದರು. 12 ವರ್ಷ ಹಾಗೂ ಅದಕ್ಕಿಂತ ಮೇಲ್ಪಟ್ಟ ಮಕ್ಕಳು ‘ಕ್ಯಾನ್ಸರ್ ನಂತರದ ಬದುಕು’ (Life Beyond Cancer) ಎಂಬ ವಿಷಯದ ಮೇಲೆ ಸೃಜನಶೀಲ ಬರವಣಿಗೆ ಮತ್ತು ವಿಚಾರಮಂಥನ ಗೋಷ್ಠಿಯಲ್ಲಿ ಭಾಗವಹಿಸಿ, ತಮ್ಮ ಕನಸು, ಆಕಾಂಕ್ಷೆ ಮತ್ತು ಧೈರ್ಯದ ಪಯಣಗಳಿಗೆ ಧ್ವನಿ ನೀಡಿದರು. ‘ನಾಳೆ ರಾಜ ಕೋಳಿ ಮಜಾ’ ಚಿತ್ರದ ವಿಶೇಷ ಪ್ರದರ್ಶನವು ಸಂಭ್ರಮವನ್ನು ಇಮ್ಮಡಿಗೊಳಿಸಿತು.
ದಿನದ ಅತ್ಯಂತ ಹೃದಯಸ್ಪರ್ಶಿ ಕ್ಷಣಗಳಲ್ಲಿ ಒಂದಾಗಿ, ‘ಸ್ಮೃತಿ ಗೋಡೆ’ (Memory Wall) ಅನಾವರಣಗೊಂಡಿತು. ಗುಣಮುಖರಾದ ಮಕ್ಕಳು ತಮ್ಮ ಪೋಷಕರೊಂದಿಗೆ ನಗುಮೊಗದಿಂದ ಇರುವ ಚಿತ್ರಗಳನ್ನು ಮತ್ತು ಅವರ ಕಥೆಗಳನ್ನು ಈ ಗೋಡೆ ಪ್ರದರ್ಶಿಸಿತು ಇದು ಅವರ ಸಹನಶಕ್ತಿ ಮತ್ತು ಪ್ರತಿಕೂಲತೆಯ ವಿರುದ್ಧ ಭರವಸೆಯ ಗೆಲುವಿಗೆ ಜೀವಂತ ಸಾಕ್ಷಿಯಾಗಿತ್ತು.
ಈ ಸಂಭ್ರಮದಲ್ಲಿ ಮಣಿಪಾಲ ಹಾಸ್ಪೈಸ್ ಆ್ಯಂಡ್ ರೆಸ್ಪೈಟ್ ಸೆಂಟರ್ (MHRC)ನ ನಿರ್ದೇಶಕರು ಹಾಗೂ ಪ್ಯಾಲಿಯೇಟಿವ್ ಮೆಡಿಸಿನ್ ಸಲಹೆಗಾರರಾದ ಡಾ. ಸೀಮಾ ರಾಜೇಶ್ ರಾವ್; ಮಕ್ಕಳ ಕ್ಯಾನ್ಸರ್ ವಿಭಾಗದ ಪ್ರಾಧ್ಯಾಪಕ ಹಾಗೂ ಮುಖ್ಯಸ್ಥ ಡಾ. ವಾಸುದೇವ ಭಟ್ ಕೆ; ಮತ್ತು ಮಕ್ಕಳ ಕ್ಯಾನ್ಸರ್ ವಿಭಾಗದ ‘ಆಫ್ಟರ್ ಕಂಪ್ಲೀಷನ್ ಆಫ್ ಥೆರಪಿ’ (ACT) ಕ್ಲಿನಿಕ್ನ ಇನ್ಚಾರ್ಜ್ ಹಾಗೂ ಸಹ ಪ್ರಾಧ್ಯಾಪಕಿ ಡಾ. ಎಮಿನ್ ಎ ರಹಿಮಾನ್ ಅವರು ಉಪಸ್ಥಿತರಿದ್ದರು. ಜೊತೆಗೆ ಬೋಧಕ ಸಿಬ್ಬಂದಿ, ದಾದಿಯರು, ಆರೈಕೆದಾರರು ಮತ್ತು ಹಿತೈಷಿಗಳು ಪಾಲ್ಗೊಂಡಿದ್ದರು.
ಮಕ್ಕಳ ಕ್ಯಾನ್ಸರ್ ವಿಭಾಗದ ಡಾ. ಅರ್ಚನಾ ಅವರು ಸ್ವಾಗತಿಸಿದರೆ, ಡಾ. ಸ್ವಾತಿ ಅವರು ವಂದನಾರ್ಪಣೆ ಸಲ್ಲಿಸಿದರು ಮತ್ತು ಡಾ. ಚೈತ್ರ ವೆಂಕಟೇಶ್ ಅವರು ಕಾರ್ಯಕ್ರಮ ನಿರೂಪಣೆ ಮಾಡಿದರು.
ಪ್ರತಿ ಸಣ್ಣ ಗೆಲುವನ್ನೂ ಸಂಭ್ರಮಿಸುತ್ತಾ, ‘ಯಾವ ಮಗುವೂ ಕ್ಯಾನ್ಸರ್ ಅನ್ನು ಒಂಟಿಯಾಗಿ ಎದುರಿಸಬಾರದು’ ಎಂಬ ಸಾಮೂಹಿಕ ಭರವಸೆಯನ್ನು ನವೀಕರಿಸುತ್ತಾ, ಕುಟುಂಬಗಳು, ವೈದ್ಯರು ಮತ್ತು ಸ್ವಯಂಸೇವಕರು ಒಟ್ಟುಗೂಡಿದ ಈ ಕಾರ್ಯಕ್ರಮವು ಕೃತಜ್ಞತೆ ಮತ್ತು ಆಶಾಭಾವದೊಂದಿಗೆ ಸಂಪನ್ನಗೊಂಡಿತು.
