ಮಂಗಳೂರು, ಫೆ. 25: ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಮತ್ತೊಂದು ಜಾಗತಿಕ ಗೌರವ ಲಭಿಸಿದೆ. ಏರ್ಪೋರ್ಟ್ಸ್ ಕೌನ್ಸಿಲ್ ಇಂಟರ್ನ್ಯಾಶನಲ್ (ಎಸಿಐ) ನೀಡುವ ‘ಎರ್ಪೋರ್ಟ್ ಸರ್ವಿಸ್ ಕ್ವಾಲಿಟಿ’ (ASQ) ಪ್ರಶಸ್ತಿಯನ್ನು ಆಗಮನ ವಿಭಾಗದಲ್ಲಿ ಈ ಬಾರಿ ಮಂಗಳೂರು ವಿಮಾನ ನಿಲ್ದಾಣ ತನ್ನದಾಗಿಸಿಕೊಂಡಿದೆ.
ಪ್ರಯಾಣಿಕರ ನೇರ ಪ್ರತಿಕ್ರಿಯೆಗಳು ಮತ್ತು ಗ್ರಾಹಕ ಸಂತೃಪ್ತಿಯ ಮಾನದಂಡಗಳನ್ನು ಆಧರಿಸಿ, ಎಸಿಐ ನಡೆಸುವ ಸ್ವತಂತ್ರ ಸಮೀಕ್ಷೆಯ ಫಲಿತಾಂಶದ ಮೇಲೆ ಈ ಪ್ರಶಸ್ತಿ ನೀಡಲಾಗುತ್ತದೆ. ವಿಮಾನಯಾನ ಕ್ಷೇತ್ರದಲ್ಲಿ ಅತ್ಯಂತ ಪ್ರತಿಷ್ಠಿತ ಹಾಗೂ ವಿಶ್ವಾಸಾರ್ಹ ಗೌರವವೆಂದು ಈ ಪುರಸ್ಕಾರ ಪರಿಗಣಿಸಲಾಗುತ್ತದೆ.
ಗಮನಾರ್ಹವೆಂದರೆ, 2024ರಲ್ಲಿಯೂ ಮಂಗಳೂರು ವಿಮಾನ ನಿಲ್ದಾಣ ಇದೇ ವಿಭಾಗದಲ್ಲಿ ಪ್ರಶಸ್ತಿ ಪಡೆದು ಸಾಧನೆ ಮಾಡಿತ್ತು. ಈ ವರ್ಷದ ಪ್ರಶಸ್ತಿ ಪ್ರದಾನ ಸಮಾರಂಭವು ಸೆಪ್ಟೆಂಬರ್ 2ರಂದು ಟರ್ಕಿಯ ಇಸ್ತಾಂಬುಲ್ ನಗರದಲ್ಲಿ ನಡೆಯಲಿರುವ ಎಸಿಐ ವಿಶ್ವ ವಿಮಾನ ನಿಲ್ದಾಣ ಅನುಭವ ಶೃಂಗಸಭೆಯಲ್ಲಿ ಜರುಗಲಿದೆ.
