ಜ.30: ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನದ ಹುಂಡಿಯಲ್ಲಿ ಜನವರಿ 29ರಂದು ಒಟ್ಟು ₹1,39,28,383 ಮೊತ್ತದ ಕಾಣಿಕೆ ಸಂಗ್ರಹವಾಗಿದೆ. ಇದರಲ್ಲಿ 350 ಗ್ರಾಂ ಚಿನ್ನ ಹಾಗೂ 1,670 ಗ್ರಾಂ ಬೆಳ್ಳಿ ಸೇರಿದೆ.
ಹಿಂದಿನ ತಿಂಗಳೊಂದಿಗೆ ಹೋಲಿಸಿದರೆ, ಅಂದು 695 ಗ್ರಾಂ ಚಿನ್ನ ಮತ್ತು 2.985 ಕಿಲೋಗ್ರಾಂ ಬೆಳ್ಳಿಯೊಂದಿಗೆ ₹1,64,45,384 ಮೊತ್ತ ಸಂಗ್ರಹವಾಗಿತ್ತು. ಈ ಹಿನ್ನೆಲೆಯಲ್ಲಿ ಕಳೆದ ಎರಡು ತಿಂಗಳ ಒಟ್ಟು ಹುಂಡಿ ಆದಾಯ ದಾಖಲೆಯ ಮಟ್ಟಕ್ಕೆ ಏರಿಕೆಗೊಂಡು ₹3,03,73,767 ತಲುಪಿದೆ ಎಂದು ದೇವಸ್ಥಾನದ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ದೇವಾಲಯದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಬಾಬು ಶೆಟ್ಟಿ ಮಾತನಾಡಿ, ಸತತ ರಜೆಗಳು ಹಾಗೂ ವಾರಾಂತ್ಯಗಳ ಪರಿಣಾಮವಾಗಿ ಕಳೆದ ಮೂರು ತಿಂಗಳಿನಿಂದ ದಿನವೂ ಸರಾಸರಿ 15 ಸಾವಿರಕ್ಕೂ ಹೆಚ್ಚು ಭಕ್ತರು ದೇವಾಲಯಕ್ಕೆ ಆಗಮಿಸುತ್ತಿದ್ದಾರೆ ಎಂದು ಹೇಳಿದರು. ಜನವರಿ ತಿಂಗಳಲ್ಲಿ ಮಾತ್ರ ದಿನಂಪ್ರತಿ ಸುಮಾರು 20 ಸಾವಿರ ಭಕ್ತರು ದರ್ಶನ ಪಡೆದಿದ್ದಾರೆ ಎಂದರು.
