ಬೆಂಗಳೂರು, ಮಾ. 10: ಆಧುನಿಕ ಯುಗದಲ್ಲಿಯೂ ವಿದ್ಯಾವಂತರೇ ಮೂಢನಂಬಿಕೆಗೆ ಒಳಗಾಗುವ ಘಟನೆಗಳು ನಡೆಯುತ್ತಿವೆ ಎಂಬುದಕ್ಕೆ ರಾಜಧಾನಿಯಲ್ಲಿ ನಡೆದ ಈ ಪ್ರಕರಣ ಉದಾಹರಣೆಯಾಗಿದೆ. ವರ್ಗಾವಣೆ ಹಾಗೂ ಜೀವನದಲ್ಲಿ ಪ್ರಗತಿ ಸಾಧಿಸುವ ಆಮಿಷಕ್ಕೆ ಒಳಗಾದ ಆದಾಯ ತೆರಿಗೆ (ಐಟಿ) ಇಲಾಖೆಯ ಅಧಿಕಾರಿಯೊಬ್ಬರು ಗಿಳಿಶಾಸ್ತ್ರ ಹೇಳುವ ವ್ಯಕ್ತಿಯ ಮಾತು ನಂಬಿ ಸುಮಾರು ₹35 ಲಕ್ಷ ಮೌಲ್ಯದ ಚಿನ್ನಾಭರಣಗಳನ್ನು ಕಳೆದುಕೊಂಡಿರುವ ಘಟನೆ ಬೆಳಕಿಗೆ ಬಂದಿದೆ.
ಘಟನೆಯ ವಿವರ:
ಬೆಂಗಳೂರಿನ ಐಟಿ ಕಚೇರಿಯಲ್ಲಿ ಕೆಲಸ ಮಾಡುತ್ತಿರುವ ಅಧಿಕಾರಿಗೆ ಕಳೆದ ಡಿಸೆಂಬರ್ನಲ್ಲಿ ಭಾರತಿನಗರದ ಶ್ರೀ ಸರ್ಕಲ್ ಬಳಿ ಗಿಳಿಶಾಸ್ತ್ರ ಹೇಳುವ ಶೇಖರ್ ಎಂಬಾತ ಪರಿಚಯವಾಗಿದ್ದ. ಮುಖ ನೋಡಿ ಭವಿಷ್ಯ ಹೇಳುವುದಾಗಿ ಹೇಳಿ, ಆತನ ವಿಶ್ವಾಸವನ್ನು ಗೆದ್ದಿದ್ದಾನೆ.
ವಂಚನೆ ನಡೆದ ವಿಧಾನ:
ಹಂತಹಂತವಾಗಿ ಅಧಿಕಾರಿಯನ್ನು ತನ್ನ ಮಾತಿಗೆ ಒಳಪಡಿಸಿಕೊಂಡ ಶೇಖರ್, ಜೀವನದಲ್ಲಿ ಯಶಸ್ಸು ಹಾಗೂ ಉತ್ತಮ ವರ್ಗಾವಣೆಗೆ ವಿಶೇಷ ಪೂಜೆ ಮಾಡಿಸಬೇಕೆಂದು ಹೇಳಿ ಮೊದಲು ₹50 ಸಾವಿರ ಪಡೆದುಕೊಂಡಿದ್ದ. ಬಳಿಕ ದೊಡ್ಡ ಪೂಜೆಗೆ ಮನೆಯಲ್ಲಿರುವ ಚಿನ್ನಾಭರಣಗಳನ್ನು ತರಬೇಕೆಂದು ಹೇಳಿ ಒಟ್ಟು 194 ಗ್ರಾಂ ಚಿನ್ನ ಮತ್ತು 1 ಕೆಜಿ 300 ಗ್ರಾಂ ಬೆಳ್ಳಿ (ಸುಮಾರು ₹35 ಲಕ್ಷ ಮೌಲ್ಯ) ತನ್ನ ವಶಕ್ಕೆ ಪಡೆದುಕೊಂಡಿದ್ದಾನೆ.
ಪೂಜೆ ನೆಪದಲ್ಲಿ ಕಾಲಹರಣ:
ಒಂದು ದಿನದಲ್ಲೇ ಆಭರಣಗಳನ್ನು ಮರಳಿ ನೀಡುವುದಾಗಿ ಹೇಳಿದ ಶೇಖರ್ ನಂತರ ಒಂದು ವಾರ ಕಾಲ ‘ಪೂಜೆ ಇನ್ನೂ ಪೂರ್ಣವಾಗಿಲ್ಲ’ ಎಂದು ಹೇಳಿ ಕಾಲಹರಣ ಮಾಡಿದ್ದ. ಅನುಮಾನಗೊಂಡ ಅಧಿಕಾರಿ ಸ್ಥಳಕ್ಕೆ ತೆರಳಿ ನೋಡಿದಾಗ ಶೇಖರ್ ಅಲ್ಲಿಂದ ಪರಾರಿಯಾಗಿರುವುದು ಗೊತ್ತಾಗಿದೆ. ಮೊಬೈಲ್ ಕರೆ ಮಾಡಿದರೂ ಸಂಪರ್ಕ ಸಾಧ್ಯವಾಗಲಿಲ್ಲ.
ನಂತರ ತಾನು ಮೋಸ ಹೋಗಿರುವುದು ಅರಿತ ಅಧಿಕಾರಿ ಭಾರತಿನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತಲೆಮರೆಸಿಕೊಂಡಿರುವ ಆರೋಪಿಯ ಪತ್ತೆಗೆ ಶೋಧ ಕಾರ್ಯ ಮುಂದುವರಿಸಿದ್ದಾರೆ.
