ನವದೆಹಲಿ, ಫೆ. 21: ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್ಎಚ್ಎಐ) ದೇಶದಾದ್ಯಂತ ರಾಷ್ಟ್ರೀಯ ಹೆದ್ದಾರಿ ಟೋಲ್ ಪ್ಲಾಜಾಗಳಲ್ಲಿ 2026ರ ಏಪ್ರಿಲ್ 1ರಿಂದ ನಗದು ವಹಿವಾಟುಗಳನ್ನು ಸಂಪೂರ್ಣವಾಗಿ ನಿಲ್ಲಿಸುವ ಪ್ರಸ್ತಾವನೆ ಮಾಡಿದೆ. ಇದರಂತೆ, ಎಲ್ಲಾ ಟೋಲ್ ಶುಲ್ಕ ಪಾವತಿಗಳನ್ನು ಫಾಸ್ಟ್ಟ್ಯಾಗ್ ಹಾಗೂ ಯುಪಿಐ ಸೇರಿದಂತೆ ಡಿಜಿಟಲ್ ಮಾರ್ಗಗಳ ಮೂಲಕವೇ ಪ್ರಕ್ರಿಯೆಗೊಳಿಸುವ ಯೋಜನೆ ರೂಪಿಸಲಾಗಿದೆ.
ಗುರುವಾರ ಹೊರಡಿಸಿದ ಅಧಿಕೃತ ಪ್ರಕಟಣೆಯಲ್ಲಿ, ದೇಶದಲ್ಲಿ ಸಂಪೂರ್ಣ ಡಿಜಿಟಲ್ ಟೋಲಿಂಗ್ ವ್ಯವಸ್ಥೆಯನ್ನು ಬಲಪಡಿಸುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ತಿಳಿಸಲಾಗಿದೆ. ಎಲೆಕ್ಟ್ರಾನಿಕ್ ಟೋಲ್ ಸಂಗ್ರಹಣೆಯಿಂದ ಈಗಾಗಲೇ ಕಂಡುಬಂದಿರುವ ಸಕಾರಾತ್ಮಕ ಫಲಿತಾಂಶಗಳನ್ನು ಮತ್ತಷ್ಟು ವಿಸ್ತರಿಸುವ ಗುರಿಯೂ ಇದಕ್ಕೆ ಹೊಂದಿಕೊಂಡಿದೆ.
ಈ ಪರಿವರ್ತನೆಯಿಂದ ಟೋಲ್ ಪ್ಲಾಜಾಗಳಲ್ಲಿ ವಾಹನಗಳ ಸಂಚಾರ ವೇಗ ಹೆಚ್ಚಳ, ದಟ್ಟಣೆ ಕಡಿತ ಮತ್ತು ವಹಿವಾಟುಗಳಲ್ಲಿ ಪಾರದರ್ಶಕತೆ ಹೆಚ್ಚುವ ನಿರೀಕ್ಷೆ ಇದೆ. ಪ್ರಯಾಣಿಕರಿಗೆ ‘ಸುಲಭ ಪ್ರಯಾಣ’ ಅನುಭವ ಕಲ್ಪಿಸುವುದು ಪ್ರಮುಖ ಉದ್ದೇಶ ಎಂದು ಎನ್ಎಚ್ಎಐ ಸ್ಪಷ್ಟಪಡಿಸಿದೆ.
ಕಳೆದ ಕೆಲವು ವರ್ಷಗಳಲ್ಲಿ ಫಾಸ್ಟ್ಟ್ಯಾಗ್ ಬಳಕೆ 98 ಶೇಕಡಕ್ಕಿಂತ ಹೆಚ್ಚು ಹೆಚ್ಚಳ ಕಂಡಿದ್ದು, ದೇಶದ ಟೋಲ್ ಸಂಗ್ರಹಣಾ ಪದ್ಧತಿಯಲ್ಲಿ ಮಹತ್ವದ ಬದಲಾವಣೆ ತಂದಿದೆ. ಆರ್ಎಫ್ಐಡಿ ತಂತ್ರಜ್ಞಾನ ಆಧಾರಿತ ಫಾಸ್ಟ್ಟ್ಯಾಗ್ ಮೂಲಕ ವಾಹನಗಳಿಂದ ನೇರವಾಗಿ ಶುಲ್ಕ ವಸೂಲಿ ಮಾಡಲಾಗುತ್ತಿದ್ದು, ಟೋಲ್ ಪ್ಲಾಜಾಗಳಲ್ಲಿ ಸಂಪರ್ಕರಹಿತ ಸಂಚಾರ ಸಾಧ್ಯವಾಗಿದೆ. ಜೊತೆಗೆ, ಟೋಲ್ ಪಾವತಿಗೆ ಯುಪಿಐ ಸೌಲಭ್ಯವೂ ಬಹುತೇಕ ಪ್ಲಾಜಾಗಳಲ್ಲಿ ಜಾರಿಗೆ ಬಂದಿದೆ.
ಪ್ರಚಲಿತ ನಿಯಮಗಳ ಪ್ರಕಾರ, ಮಾನ್ಯ ಫಾಸ್ಟ್ಟ್ಯಾಗ್ ಇಲ್ಲದೇ ಟೋಲ್ ಪ್ಲಾಜಾಗೆ ಬಂದ ವಾಹನಗಳು ನಗದು ಪಾವತಿಸಿದಲ್ಲಿ, ಸಾಮಾನ್ಯ ಶುಲ್ಕದ ದ್ವಿಗುಣ ಮೊತ್ತ ವಿಧಿಸಲಾಗುತ್ತದೆ. ಯುಪಿಐ ಮೂಲಕ ಪಾವತಿ ಮಾಡಿದರೆ, ಅನ್ವಯಿಸುವ ಶುಲ್ಕದ 1.25 ಪಟ್ಟು ಹಣ ಸಂಗ್ರಹಿಸಲಾಗುತ್ತದೆ.
ಪ್ಲಾಜಾ ಮಟ್ಟದ ಅಧ್ಯಯನಗಳು ನಗದು ಪಾವತಿಗಳಿಂದ ಗರಿಷ್ಠ ಸಮಯದಲ್ಲಿ ಉದ್ದನೆಯ ಸಾಲುಗಳು, ವಿಳಂಬ ಮತ್ತು ವಹಿವಾಟು ಸಂಬಂಧಿತ ತಕರಾರುಗಳು ಹೆಚ್ಚಾಗುತ್ತಿರುವುದನ್ನು ತೋರಿಸಿವೆ. ಹೀಗಾಗಿ, ದೇಶದ ರಾಷ್ಟ್ರೀಯ ಹೆದ್ದಾರಿಗಳು ಹಾಗೂ ಎಕ್ಸ್ಪ್ರೆಸ್ವೇಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ 1,150ಕ್ಕೂ ಹೆಚ್ಚು ಟೋಲ್ ಪ್ಲಾಜಾಗಳಲ್ಲಿ ಡಿಜಿಟಲ್ ಪಾವತಿಗೆ ಸಂಪೂರ್ಣ ಬದಲಾವಣೆ ತರಲು ಎನ್ಎಚ್ಎಐ ಮುಂದಾಗಿದೆ. ಇದು ಸಂಚಾರ ನಿರ್ವಹಣೆಯನ್ನು ಸುಧಾರಿಸಿ ಕಾರ್ಯಾಚರಣಾ ದಕ್ಷತೆಯನ್ನು ಹೆಚ್ಚಿಸುವುದಾಗಿ ಪ್ರಾಧಿಕಾರ ವಿಶ್ವಾಸ ವ್ಯಕ್ತಪಡಿಸಿದೆ.
